e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Grob-Ganzoni, Anna Pitschna Grono  Gronda Britannia Las emprimas relaziuns tr. la G. e la Svizra èn attestadas - abstrahà da las influenzas da la missiun scotta-irlandaisa dal temp cristian tempriv - enturn il 1514. Il retg Heinrich VIII aveva offert als Confederads in'allianza, annullada tras la Pasch eterna concludida il 1516 cun la Frantscha. En rapports da viadi scrits dad Englais che percurrivan la Svizra vegn il Grischun menziunà savens, spezialmain dapi il 16. tsch.: Sir Henry Wotton, delegà da la G. a Vaniescha il 1604-05 aveva visità pliras giadas las Trais Lias e demussà grond interess per la Refurmaziun al sid da las Alps. Thomas Coryat, ch'ha frequentà la Svizra a l'entsch. dal 17. tsch., era impressiunà dal "parlament" democratic grischun (v.d. da la Dieta da las Lias) e da las pussaivladads da viagiar e da far commerzi en la Republica grischuna, e quai da di e da notg, libramain e senza ristga («Coryat's Crudities hastily gobbled up in Five Months Travels in France, Italy, & c.»). En ses «Itinerary» dal 1617 descriva Fynes Moryson l'organisaziun politica dals chantuns svizzers e quella da las Trais Lias ed è fascinà surtut da l'urden democratic e da la toleranza en dumondas da cardientscha. Ina gronda carriera sco cussegliader ed ambassadur dad Oliver Cromwell ha fatg suenter il 1652 il teolog Johann Baptist Stuppan da Clavenna. A l'entsch. dal 18. tsch. èn s'intensivadas las relaziuns diplomaticas tr. la G. e la Confederaziun. Abraham Stanyan, ambassadur britannic en Svizra dal 1705-13 ed accredità tar las Trais Lias dapi il 1707, ha publitgà il 1714 a Londra ses «Account of Switzerland», en il qual el ha deditgà in lung chapitel a la Republica da las Trais Lias. Pauc temp avant aveva il preditgant Johann Christian Leonhardi rendì enconuschent il Grischun en la G. cun "Ina curta descripziun da la Republica retica democratica, libra e dependenta unicamain da Dieu" (orig. latin) publitgada il 1704 a Londra) e cun ses «An Account of the Grisons» (1711) en il qual el lauda tr.a. il famus "vine of Rhaetia" (v.d. il vin-Vuclina) e fa allusiun a la lingua rumantscha. Enturn il 1700 han las relaziuns tr. la G. ed il Grischun cuntanschì lur culminaziun. Ils dus pajais han manifestà dapi il 1690 repetidamain ed en maniera entusiastica lur amicizia, p.ex. en furma dad imnis u poesias en onur dal retg William III (redigidas en rum. e tud.) u en furma da dedicaziuns, sco p.ex. quella da la «La sacra Bibla» dal 1718 a George I, retg da la G. In contract d'allianza tr. la G. ed il Grischun, preparà il 1742-45 tras Salomon von Sprecher, n'ha betg pudì vegnir stipulà. En il 18. tsch. èn numerus Grischuns emigrads en la G., tr. quels plirs commerziants e mastergnants engiadinais. Blers dad els han fatg grondas carrieras: Andreas Planta da Susch è daventà bibliotecar privat dal retg George III, ses figl Joseph ha publitgà il 1776 «An Account of Romansh Language» e ses biadi Joseph è stà blers onns secretari dal ministeri englais dals affars externs en Europa. Il 1766 è Angelika Kauffmann daventada confundatura da la Royal Academy a Londra. Hieronymus Salis finalmain, natiralisà il 1731 en la G., è stà ambassadur englais en las Trais Lias dal 1743-49, nua ch'el ha laschà construir il Palazzo a Buond (1766). Il 1800 han gremis conservativs dal Grischun empruvà da gudagnar la G. per lur interess, ed il mars 1800 ha la Regenza interimala dumandà la G. da nominar ses ambassadur en Svizra, Wilhelm Wicham, sco minister da las Trais Lias, quai ch'il retg George III ha fatg immediat. Il Grischun aveva era quintà cun il sustegn da la G. al Congress da Vienna en connex cun la restituziun da la Vuclina. Perfin la claustra da Mustér aveva scrit ils 20-11-1814 a la G. e supplitgà quella da s'engaschar a Vienna en favur d'ina restituziun da ses bains en Vuclina, sequestrads da la Confisca il 1799. Questa finamira n'è dentant betg vegnida cuntanschida. Dapi l'Illuminissem e l'interess (romantic) creschent per l'alpinissem èn scripturs englais s'occupads dal Grischun en rapports da viadis:  William Coxe, ch'ha visità la Svizra tr. il 1779 ed il 1800, ha descrit en ses «Travels in Switzerland» (1789) la vita, ils usits ed il sistem politic dals Svizzers e dals Grischuns; a l'exempel da Tavau ha el illustrà il funcziunament da la democrazia directa en in cumin grischun da quel temp; el ha era menziunà la lingua rum., discurrida da quel temp da la maioritad dals Grischuns, e la derasaziun da quella en furma scritta dapi il 16. tschientaner. Fascinà da la democrazia grischuna era medemamain il segund pres. dals Stadis Unids da l'America, John Adams (1797-1801): en sia ovra «Defence of the Constitutions» (1787) ha el valità il Grischun sco "il Stadi constituziunalmain il pli democratic dal mund". Menziun spez. en il 19. tsch. merita surtut il rapport da Foster Barham Zincke «A walk in the Grisons» (1875), en il qual el remartga o.t. la parcellaziun extrema dal terren ed il grond dumber da pitschens possessurs da funs en il Grischun; Zincke lauda la buna rait da vias. Ils Englais eran ils alpinists, giasts e promoturs ils pli fervents dals lieus da cura en l'Engiadin'Ota ed a Tavau, nua ch'els han laschà construir baselgias englaisas e stampar gasettas en lur linguatg («The St. Moritz Post», 1886; «The Davos Courier», 1888; «The Courier for Ragaz, Praettigau, Davos, and the Engadine», 1894). Il 1886 è vegnida fundada a Tavau ina biblioteca englaisa. Ils Englais han era importà differents sports en il Grischun, p.ex. il golf, il tennis, il curling, il skeleton ed il bob. Anc oz visitescha la prominenza englaisa ils div. lieus da cura e da sport dal Grischun. Litteratura: A. Lätt, Intellectual Relations between Great Britain and Switzerland, 1920; B. Bucher, Abraham Stanyan 1705-1714, 1951; M. Bundi, Bündner Kriegsdienste in Holland um 1700, 1972; C. Caruso, Viaggiatori inglesi nei Grigioni, en: QGI, 56/1987, 127-33. Martin Bundi  Grob-Ganzoni, Anna Pitschna Grono  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: