e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Guisan, Henri
* 21-10-1874 a Mézières/VD, † 7-4-1960 a Pully/VD, ref., dad Avenches e Mézières. Figl da Charles-Ernest, medi e maior, e da Louise-Jeanne n. Bérengier († 1875). ∞ 1897 Mary Doelker, figlia da Christ Charles, maister pasterner. Matura a Losanna 1893, scolas agriculas ad Ecully (sper Lyon) e Hohenheim (Württemberg). Ils 30-8-1939 ha l'Assamblea fed. elegì G. general da l'armada svizra. Suenter ses famus rapport salvà il 25-7-1940 sin il Rütli ha el inspectà l'emprim la brigada da cunfin 12 (grischuna), cun la quala el ha festivà il 1. d'avust ad Arosa. Ils 2 d'avust ha el visità a l'improvista Tavau. Mez favr. 1941 ha el discutà cun il cuss. fed. Enrico Celio e la Regenza grischuna la situaziun da la Viafier retica ed ha visità ils 16 e 17 da favr., ens. cun Celio ed il cumandant da corp Renzo Lardelli, il Puschlav e la Bergiaglia. L'oct. 1941 ha el inspectà las truppas en l'entir Grischun ed ha assistì ils 15 da nov. 1942 al grond defilé da la brigada da cunfin 12 a Domat. Ils 11-8-1945 ha el fatg sia visita da cumià a la Regenza grischuna. Suenter la guerra, ils 2-6-1946, ha G. visità il 11. Tir da la Chalavaina a Tavau, nua ch'el ha era salvà ils 11 d'oct. in referat cun il titel "La Svizra durant la Segunda Guerra mundiala".
Litteratura:
NBZ, 2/4-8-1940; oct. 1941; L'on. Enrico Celio e il Generale Henri G. nel Grigioni, en: QGI, 10/1940/41, 161-66; BT, 16-11-1942; Metz, Graubünden 3, 314 s.; A. Schoop, G. in Davos, en: Davoser Revue, 71/1996, nr 1, 13-18; HLS 5, 59.
Adolf Collenberg
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Guiot, Florent