e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Guler, Hans Guler, Peter  Guler, Johannes (von Wyneck) * 31-10-1562 a Tavau, † 24-1-1637 a Cuira, ref., da Tavau. Figl da Hans e dad Anna n. Buol. ∞ 1) 1583 Barbla n. von Perini († 1588), 2) 1591 Elisabeth n. von Salis, figlia dad Andreas, vicari. Tras questa maridaglia è G. vegnì il 1602 en possess dal pitschen chastè da Wynegg sur Malans, dal qual el ha fatg sia residenza e tenor il qual el sa numnava dapi alura. Il 1569 ha el accumpagnà per dus onns ses mez frar Peter, nominà vicari, en Vuclina. Scola da lat. a Cuira, alura studis a Turitg (1574), Genevra (1580) e Basilea (1582) ch'el n'ha betg pudì terminar, perquai ch'el è vegnì elegì il 1582 scrivant e pli tard era banderiel dal cumin da Tavau. Gia il 1587 è el daventà guvernatur da la Vuclina. Dal 1592-1604 è G. stà landamma da Tavau e sco tal chau da la LDD. Engaschà repetidamain sco mess, tr. il 1600 ed il 1604, p.ex. a nov missiuns diplomaticas en la Confed., a Paris, Vaniescha e Milaun. El ha promovì energicamain in'allianza cun Vaniescha (chavalier da S. Marc 1603). Cumandant d'in regiment grischun incaricà da proteger il cunfin cun Milaun 1607; il medem onn è G. vegnì condemnà a la mort tras ina dretgira nauscha a Cuira dominada da partisans spagnols. Suenter la reabilitaziun tras ina dretgira favuraivla a Vaniescha (1607), è G. sa retratg per diesch onns da la politica activa. Il 1618 è el danovamain vegnì nobilità al chavalier a chaschun d'ina missiun a la curt franzosa. Per mitschar dals Scumbigls grischuns è G. sa domicilià cun sia fam. a Turitg ch'ha conferì ad el il dretg da burgais il 1619. Il 1620 ha el cumandà sco colonel las truppas grischunas ch'han empruvà duas giadas, senza success, da reconquistar las Terras subditas. Il 1622 ha el sustegnì la resistenza dal Partenz cunter l'Austria. Alura è G. puspè sa deditgà a sias fatschentas privatas ed ha participà mo pli sporadicamain a missiuns diplomaticas. Il 1623 è el s'acquistà tras in barat il pitschen chastè da Susenberg sper Turitg. Il 1627 è el sa transferì en sia residenza da S. Margreta a Cuira. Il 1607 possedeva el otg chasas e 78 arments a Tavau sco era vignas en il Signuradi ed a Cuira. G. ha era gì gronds merits sco istoricher e cartograf. Sia «Raetia», stampada il 1616 e deditgada a Louis XIII, è ina vasta cumpilaziun dad ovras da cronists grischuns e confederals. L'emprima part descriva l'istorgia grischuna, entant che la segunda, betg terminada, cuntegna ina descripziun dal Grischun e da sias Terras subditas, accumpagnada da tschintg tavlas geograficas. Il 1622 è cumparida sia «Pündtnerischer Handlungen widerholte und vermehrte Deduction», in'ovra destinada en emprima lingia a giustifitgar la Sullevaziun dal Partenz.   Litteratura: J. Robbi, Ritter Johannes G. von Wyneck, 1918; J. Ferdmann, Der Chronist und Staatsmann Johannes G. als Mensch und Dichter, en: Davoser Revue, 13/1937, 27-33; 13/1938, 84-90; Feller/Bonjour, Geschichtsschreibung 1, 332-34. Silvio Färber  Guler, Hans Guler, Peter  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: