Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Hämmerle [-Planta], IsaHartkopf, August lemma sequent

Hannikel
* 1742 (Jakob Reinhardt) a Darmstadt, † 17-7-1787 Sulz am Neckar (Württemberg). Chapitani legendar d'ina banda da laders e brigants. La terrur da quella ha cuntanschì sia culminaziun il 1786, cura ch'il "capobrigant ed assassin" H. ha rendì malsegiras la Svizra Orientala e las valladas dal Rain. Omicidis commess en il Grischun n'al han ins betg pudì demussar. La stad 1786 ha il cont Rudolf von Salis-Zizers fastizà H. e sia banda, da la quala faschevan part era dunnas ed uffants, en la ruina da Neuburg a Vaz Sut ed impraschunà el en il Schelmenturm a Cuira (numnà pli tard la Tur da H.). H. ha pudì fugir, el è dentant puspè vegnì arrestà dal cont von Salis e ses gidanters sin l'alp da Sargans ed impraschunà a Vaduz, alura deportà a Sulz am Neckar, nua ch'ins sentenzià el a mort ed executà. L'identitad da H. cun la figura dal Spiegelberg, chapitani brigant en «Die Räuber» da Friedrich Schiller, è pauc probabla, sia fama viva dentant vinavant en la belletristica (o.t. en romans da zagrenders) dal 19. tsch., tr.a. era en «La Ligia Grischa» d'Ulysses von Salis-Marschlins, translatada da Gion Teodor de Castelberg.


Archiv:
ASGR, protocols da las Dietas fed., ts 154, 156, 157.

Litteratura:
Sprecher/Jenny, Kulturgeschichte, 299-306 (cun bibliogr. commentada, 616 s.); Deplazes, Funtaunas 2, 112; U. Rothfuss, Schäffer, Räuberfänger: der erste "moderne" Kriminalist Württembergs, 1997.

Adolf Collenberg

lemma precedents Hämmerle [-Planta], IsaHartkopf, August lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :