e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Jegher, August Jenatsch, Johann Anton  Jenatsch Veglia schlatta ref. da l'Engiadin'Ota, residenta surtut a Samedan. La fam. è attestada per l'emprima giada il 1470 cun Andreas, publicus notarius. In descendent cun il medem num, recepì en la Sinoda il 1555, è stà plevon a Puntraschigna dal 1559-76, e ses figl Israel († 1623) en div. vischnancas grischunas tr. il 1586 ed il 1623. Il figl d'Israel, il famus Gieri Genatsch, è stà reverenda ed alura uffizier. Auters J. han studegià surtut a Turitg ed a Basilea a partir dal 16. tschientaner. Entant che la classa aristocratica dal Grischun aveva anc resguardà Gieri sco in arrivist ch'ella ha alura cumbattì e finalmain liquidà, n'ha ella betg impedì la promoziun sociala e politica da ses descendents bainstants. Paul, in figl da Gieri, ha occupà numerus uffizis politics en la LDD ed en la Republica da las Trais Lias. Ses frar Georg (1637-72), litinent colonel e cumissari elegì da Clavenna (per 1672-74) è dentant mort avant sia entrada en uffizi. Ses figl cun il medem num (1662-1741), litinent colonel en servetschs venez., è stà prob. podestat da Plür dal 1729-31. Era ils quatter figls dal Paul menziunà sura han occupà uffizis impurtants en las Trais Lias: Paul (1651-85), guvernatur elegì da la Vuclina (per ils onns 1685-87), è mort avant sia entrada en uffizi ed è vegnì substituì da ses frar Georg/Jörg (1658-1724). Andreas (1661-1709) è stà podestat da Plür (1687-89) e da Traona (1695-97) e chau da la LDD 1699-1700. El è mort avant che pudair occupar l'uffizi da vicari en Vuclina ed è vegnì sustituì il 1709-11 da Johann Anton, ses frar giuven. L'ascensiun sociala dals J. sa reflectescha en ils lioms matrimonials cun las fam. Sprecher, Buol, Planta, Schmid von Grüneck e Schorsch. En il 18. e 19. tsch. èn plirs exponents da la fam. stads activs sco uffiziers en servetschs ollandais, genuais e venezians. Johann Ulrich (1825-1911), litinent colonel en servetsch austr., è stà il davos descendent direct da Gieri. Litteratura: A. Sprecher, Stammbaum der Familie J., ms., 1940, (BCGR); Grimm, Aristokratie, 207; Collenberg, Amtsleute; Simmen, Wappen, 75 s., 123, 308. Silvio Färber  Jegher, August Jenatsch, Johann Anton  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: