Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Laely, AndreasLags lemma sequent

Lags
L'Urbari habsburgais (1303-07) menziunescha il comitat (contadi) resp. il signuradi da L. Il territori dal signuradi correspundeva quasi integralmain a quel da la veglia Rezia Sura. El cumpigliava la cuminanza dals Libers da la Val dal Rain Anteriur e da la Val dal Rain da Cuira al sid da la Landquart che disponiva d'ina atgna dretgira ed era concentrada o.t. en la Surselva, spezialmain a L. e Sevgein. Ina da las duas dretgiras da la regiun aveva sia sedia a Cuira, l'autra, per tut ils Libers da sur il guaud da Flem, a Sessafret (oz Saissafratga u Sassfau) a la punt sur il Rain a Castrisch. Il chastellan habsburgais, al qual cumpetevan ils dretgs da giurisdicziun e la protecziun da la fiera, residiava sin la fortezza da Cuolm Liung sper L. Questa fiera aveva lieu il di da s. Gagl sin il Prau Marcau al sid da Cuolm Liung a la via dal Lucmagn e vegniva frequentada tr.a. da commerziants da Ligiaun. A partir dal 1342 èn ils Libers da L. vegnids dads en pegn als conts von Werdenberg. Els han aderì a la LG il 1395, èn sa liberads dals von Werdenberg il 1428 ed èn vegnids suttamess, sco glieud libra da la Chadé, a la protecziun da l'uvestgieu da Cuira il 1434. En consequenza da cuntraversas internas èn las gruppas da L. e Sevgein sa separadas il 1518 da la communitad giudiziala dals Libers da sur il guaud da Flem ed han constituì in cumin autonom; ils emprims statuts giudizials da L.-Sevgein dateschan dal 1548. Il 1851 è il cumin vegnì attribuì al cirquit da Glion.


Litteratura:
P. Tuor, Die Freien von Laax, 1903; Laax, ina vischnaunca grischuna, red. dad A. Maissen, 1978.

Martin Bundi

lemma precedents Laely, AndreasLags lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: