Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Meyer [Maier, Meier], GregorMichael, Jacob lemma sequent

Mezzola, Lai da
Antruras part superiura dal Lai da Com, separà oz quasi cumplettamain da quel tras sediments da l'Adda. M. designava oriundamain la zona a la riva nord dal Lai da Com, colmatada da la Maira ad ina peninsla. En il temp rom. tanscheva il lai fin a Samolaco. Il port, che sa chattava a S. Giovanni al sidost da Casenda, è vegnì spustà enturn l'onn 1000 en consequenza da la terrenisaziun da Vigazzolo a Riva al nord da Novate. Riva è stà fin en il 19. tsch. in lieu da transtgargiada per il transit internaz. nord-sid sur il Spleia ed il Set. Qua sa chattavan la fortezza da M. per la controlla dal traffic sin l'aua e la terra, ina susta ed in ospizi (fin viaden il 19. tsch.), pastgiras per chavals e muvel sco era implants da pestgar. Ins incassava qua in pitschen dazi, ina taxa da pasculaziun ed ina taglia da port. Suenter l'annexiun da la Vuclina tras ils Grischuns (1512), ch'han construì vias tr. Dubino e Novate, ha augmentà il traffic fermamain; il Lai da M. sa chattava ussa al cunfin dal contadi grischun da Clavenna cun il ducadi da Milaun. Ils implants da pestgar, oriundamain in privilegi roial, èn passads als Grischuns ch'han pers els durant la Guerra da trent'onns e recuperà pir cun il Terz Capitulat da Milaun (entrà en vigur 1763). Il 1797 è il Lai da M. daventà part da la Republica cisalpina, pli tard da la Lumbardia. Tras sediments da la Mera è il Lai da M. vegnì separà a partir dal 16. tsch. en il conturn da Novate quasi cumplettamain dal pitschen Laghetto (numnà era Pozzo di Riva).


Litteratura:
M. Fattarelli, La Riva di M., en: Clavenna, 7/1968, 9-26.

Martin Bundi

lemma precedents Meyer [Maier, Meier], GregorMichael, Jacob lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :