e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Leun LG  Lex Romana Curiensis La Lex Romana Curiensis è ina registraziun dal dretg vulgar rom. occidental da l'emprima mesadad dal 8. tsch., influenzà da concepziuns da dretg franconas sco era d'ulteriuras concepziuns betg determinablas cleramain. Ella è prob. il resultat da l'unda culturala visigotic-pirminica en la Currezia, ma senza valur legislativa. La Lex Romana Curiensis è da gronda impurtanza per l'istorgia culturala dal Grischun e dal Vorarlberg. Da trais manuscrits tradids a moda cumpletta èn dus d'origin retic. La derivanza veronaisa dal terz manuscrit sco era dus fragments milanais fan pensar ad in'ulteriura derasaziun en l'Italia dal Nord. La designaziun Lex Romana Curiensis, introducida en il 19. tsch. ed istoricamain betg attestada, è equivoca era dal punct da vista dal cuntegn. La concepziun ed il cuntegn da basa da la Lex Romana Curiensis sa basan cleramain sin la «Lex Romana Visigothorum», relaschada dad Alarich II il 506. I na sa tracta pia betg d'ina creaziun retica, mabain d'ina interpretaziun fallada dal model tras l'elavuratur, quai che demussa cleramain la perdita da las enconuschientschas dal dretg roman. L'idea anteriura, tenor la quala la Lex Romana Curiensis avess da reflectar il dretg vertent da quel temp en la Currezia, sto vegnir considerada sco inexacta sin fundament da cumprovas da faussas interpretaziuns tematicas dal model e da la mancanza da voluntad legislativa da vart da l'elavuratur. Las retschertgas recentas preschentan quasi unanimamain la Lex Romana Curiensis sco recepziun litterara dal dretg rom. vulgar occidental che, lunsch davent da tangar la prioritad dal dretg da disa vertent, è sez influenzà ed alterà da quel. En quest reguard è ella d'interess spez. per l'istorgia dal dretg.    Litteratura: C. Soliva, Römisches Recht in Churrätien, en: JHGG, 1986, 189-206 (cun bibliogr.); K.H. Burmeister, Zur Bedeutung der sogenannten "Lex Romana Curiensis" für die Vorarlberger Landesgeschichte, en: Montfort, 42/1990, quad. 1, 82-90; H. Siems, Handel und Wucher im Spiegel frühmittelalterlicher Rechtsquellen, 1992, 325-27, 815. Jon Peider Arquint  Leun LG  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: