e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Lia da la chadaina (1637)
Lia secreta constituida a l'epoca dals Scumbigls grischuns. En il Contract da Clavenna dals 7-2-1636 aveva il duca Henri de Rohan offert als Grischuns la restituziun da la Vuclina sut la cundiziun ch'els desistian da la giurisdicziun e renunzian a l'admissiun da la cretta ref. en Vuclina. Quai era vegnì acceptà cun gronda disfidanza envers la Frantscha. Il nov. 1636 han Meinrad Buol, Gieri Genatsch e Hans Schorsch tractà cun l'Austria e la Spagna a Puntina. Da questa "intriga patriotica" è sortì il disgrazià Contract da Puntina dals 7-1-1637 (signà ils 17-1-1637 a Milaun). Sco in dals diplomats responsabels ha Genatsch reagì immediat, unind clandestinamain 31 uffiziers ed umens da stadi grischuns en l'uschen. Lia da la chadaina, fundada ils 6-2-1637 en la chasa da Gregor Meyer, burgamester da Cuira. Genatsch sez n'ha dentant betg fatg part da quella lia che vuleva bandischar ils Franzos e reconquistar la Vuclina cun agid da la Spagna. Ils 21-3-1637 ha Genatsch, colonel e confident dal Duca de Rohan, tschinclà cun 3'000 umens la Rohanschanze sper Landquart. Tradì, ha Rohan capitulà ils 26 da mars, ed ils 5 da matg è el vegnì congedià a Cuira cun tut las onurs ch'in ami dal Grischun merita. Tras la dretgira nauscha dal 1659 han ils cumins renconuschì la necessitad da la Lia da la chadaina ch'els han legitimà ex post ensemen cun ils congiurads.
Litteratura:
Pieth, Bündnergeschichte, 221-23; HbBG 2, 190 s.
Adolf Collenberg
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
LG