e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Kauffmann, Angelika
* 30-10-1741 (Maria Anna Angelika Catharina) a Cuira, † 5-11-1807 a Roma, cat., da Schwarzenberg (Bregenzerwald). Figlia da Johann Joseph, pictur, e da Cleofea n. Luz, figlia d'ina spendrera a Cuira. ∞ 1) Frederick (Ferdinand?) de Horn (pseudonim d'in engianader da maridaglia), 2) 1781 Antonio Zucchi, pictur da vedutas, d'ina fam. d'artists veneziana. Accumpagnond ses bab tar div. incumbensaders, ha K. passentà sia uffanza e giuventetgna a Murbegn, Com e Milaun. Indecisa tr. la carriera da pictura e quella da chantadura - tscherna evocada pli tard en in autopurtret - è ella sa decidida per la pictura ed è vegnida scolada da ses bab. Suenter la mort da la mamma, han bab e figlia ornà il 1757 cun frescos la baselgia da Schwarzenberg, en la quala K. ha realisà ils frescos dals 12 apostels. Da quel temp ha ella gia exequì purtrets per incumbensa. Durant in viadi da studi a Milaun, Parma, Firenza, Roma e Napel ha ella copià ovras dals gronds maisters talians. Sco dunna ha ella dentant stuì lavurar en ils museums separada dals students d'art. Ella ha stabilì contacts cun auters artists sco Benjamin West, il futur directur da la Royal Academy da Londra, e cun incumbensaders, tr. ils quals l'englais John Parker, viagiatur dal Grand Tour. Il 1763 è ella sa profilada a Roma cun in purtret da Johann Joachim Winckelmann. Gia da quel temp ha ella exequì picturas d'istorgia en il stil classicistic (p.ex. «Bacchus ed Ariadne», exponì en la chasa com. da Briganza). Il 1766 ha ella avert in atelier a Londra, nua ch'ella ha cuntanschì la culminaziun da sia carriera. Tr. ses incumbensaders èn stads la regina Charlotte da l'Engalterra, il zar russ Paul I e la zara Catharina II, l'imp. Joseph II d'Austria ed il papa Pius VI. K. è stada confundatura da la Royal Academy e comm. da las Academias da Bologna, Roma e Vaniescha. Il 1780 è vegnida restampada a Londra sia ovra grafica che cumpigliava ca. 41 fegls. En quella perioda è K. sa deditgada pli intensivamain al tema da la dunna en cordoli ed ha malegià tondos d'Ariadne, Penelope, Calypso e Maria la Narra - ina figura litterara da Lawrence Stern. Quests maletgs radunds en format pitschen eran fitg appreziads. Gravaders, decoraturs da l'intern, creaders da mobiglias e picturs sin porcellana èn s'inspirads da sias ovras. Suenter dus segiurns a la curt da Napel, nua ch'ella ha realisà in purtret da la fam. roiala, è ella turnada il 1782 per adina a Roma. Ses atelier ha attratg artists classicistics e viagiaturs da tut l'Europa, tr. ils quals ils exponents dal circul da Weimar enturn Johann Wolfgang von Goethe. Fin il 1800 è K. stada ina da las pli impurtantas picturas d'istorgia dal classicissem europeic. Antonio Canova e l'Academia da Roma han organisà per K. ina sepultura pumpusa, a chaschun da la quala ina gronda fulla ha prendì cumià da la "pictura da la Grazia" che giudeva dapertut auta stima. Johann Gottfried Herder ha onurà ella sco "la dunna forsa la pli cultivada da l'Europa". Tavla commemorativa en la Reichsgasse 57 a Cuira (chasa natala).
Ovras:
La "Memoria delle piture" di Angelica K., edì da C. Knight, 1998.
Funtaunas:
Memorie istoriche di Maria Angelica K. Zucchi riguardanti l'arte della pittura da lei professata scritte da Giuseppe Carlo Zucchi, edì e commentà da H. Swozilek, 1999.
Litteratura:
Angelika K., catalog d'expos. Düsseldorf, 1998; BLSK, 559-61; A. Rosenthal, Angelica K.: Art and Sensibility, 2006; B. Baumgärtel, Angelika K. 1741-1807 - il catalog critic cumplet da la pictura ed ovra grafica (en preparaziun).
Bettina Baumgärtel
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Kasthofer, Karl Albrecht