e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Massner, Daniel Mastergnanza  Massner, Thomas * 30-9-1663 a Cuira, † 3-9-1712 a Feldkirch, ref., da Cuira. Figl da Johannes e da Margaretha von Tscharner. ∞ Ursina n. Stampa, figlia d'in speditur a Clavenna. Menz. il 1696 sco interprendider da transport. Sia firma da spediziun Thomas Massner & Sohn a Cuira ha cuntanschì spert ina posiziun dominanta. Sco commerziant è el s'engaschà en il commerzi da ris, vin, textilias e metals, sco banchier en affars da cambialas e da credits. En servetsch da pussanzas estras ha el tschertgà da profitar da ses contacts per intents politics, p.ex. sco agent per ils ambassadurs franz. a Soloturn e per ils mess a Cuira. Suenter il naufragi da ses plans per in battagliun M., ha el midà il 1702 en il champ austr. ed è stà fin il 1704 cumissari imperial per il traffic da cuntrabanda (per impedir il passagi dad armas a l'inimi). El ha utilisà questa posiziun en favur da sia firma, s'occupond dal commerzi cun chavals, d'affars mercenars e prob. era da la falsificaziun da munaidas. Il 1706 ha M. agì en favur d'ina allianza da las Trais Lias cun Vaniescha, il 1707, en servetsch dal mess engl., en favur dal tractat davart ils pass alpins cun las pussanzas maritimas. Entrà il 1684 en la mastergnanza dals cusunzs da Cuira, è el daventà maister da mastergnanza il 1686, bandierel il 1688, emprim maister da mastergnanza il 1699 e cuss. munic. il 1703. Il 1704 ha M. ingiantà, ens. cun Otto Schwarz, la fittanza dals dretgs da duana da las Trais Lias. A partir dal 1707 è el stà activ sco cumissari da truppas durant il passagi d'armadas estras tras il Grischun ed a partir dal 1708 sco inspectur da las lavurs da meglieraziun dal tschancun da via da la vart sid dal Spleia, proponidas dad el sez. El n'ha dentant betg pli pudì occupar ils uffizis dal podestat da Traona e dal landfoct da Maiavilla ch'el aveva gia acquistà (tras cumpra). Il 1710 è vegnì rapinà ses unic figl en vischinanza da Genevra e translocà en Frantscha sco pegn per presumptivas pretensiuns da daners, a las qualas M. ha respundì cun far praschunier il prinzi Philippe de Vendôme. Sut il num Affar Massner ha quest'istorgia spert fatg il gir en tut l'Europa ed è vegnida interpretada sco conflict tr. la Frantscha e l'Austria. Il 1711 ha la dretgira nauscha da Glion sentenzià M. a la mort en contumazia ed ha confiscà sia facultad. M. aveva spert fatg carriera sco commerziant ed interprendider, sin il champ politic n'ha el dentant betg pudì realisar sias ambiziuns. Litteratura: M. Hilfiker, Thomas M., 1663-1712, 1978. Jürg Simonett  Massner, Daniel Mastergnanza  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: