e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Niggli, Hans Noblezza  Ninguarda, Feliciano * ca. 1524 a Murbegn, † 5-1-1595 a Com, cat., da Buorm. Figl da Marco, chapit. en servetschs milanais. Suenter la scolaziun en las claustras dals dominicans da Murbegn e Milaun, è N. entrà il 1549 en l'urden a Murbegn. Il 1556 è el sa rendì a Vienna per tractar la refurma da la claustra, ed a partir dal 1559 è el stà activ en l'archuvestgieu da Salzburg, tr.a. sco procuratur al Concil da Trent. Dal 1578-83 è el stà nunzi en la Germania dal Sid, ed il 1579 ha el obtegnì l'extensiun da sias plenipotenzas sin ils lieus cat. da la Rezia, quasi il medem mument sco il nunzi Giovanni Francesco Bonomi. Sco subdit grischun enconuscheva N. bain las relaziuns en l'uvestgieu da Cuira. En ils onns 1577-80 ha el empruvà, senza success, da persvader l'uv. Beatus a Porta da returnar a Cuira e da reglar sia successiun cun la nominaziun da l'avat songaglias Joachim Opser sco coadjutur cun dretg da successiun. Questa nominaziun tegnida secreta (1579) e las tractativas da N. a Lucerna e Feldkirch cun ils lieus cat. e cun represchentants da las Trais Lias n'han l'emprim betg gì success. A Porta ha resignà il 1580 sut pressiun da Bonomi. Sco uvestg da Com ha N. visità il 1589 ed il 1593 tr.a. las plaivs en la Vuclina. El correspundeva a l'ideal d'in uvestg da refurma tridentin. Litteratura: HS I/1, 43; I/6, 189 s.; Feliciano N. riformatore cattolico, edì da G. Perotti, S. Xeres, 1999 (cun reg. d'ovras e bibl.). Pierre Surchat  Niggli, Hans Noblezza  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: