Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Porclas [Porclis]Porta, Andreas Rosius à lemma sequent

Porta, a [à, da, de la, von]
Famiglia ministeriala d'origin nuncler. Tr. il 1259 ed il 1521 cumparan pliras persunas cun il num vom Thurn u de Port sco ministerials episcopals e possessurs da la tur a Brinzauls. Il 1400 possedevan ils frars Wilhelm e Hans feuds dal signuradi episcopal da Greifenstein. Da la medema lingia deriva prob. era Jakob, il 1411/15 chastellan ed administratur episcopal u avugà da Greifenstein a Filisur. Ina lingia è prob. emigrada da Brinzauls en l'Engiadina Bassa, nua ch'èn attestads enturn il 1400 a Ftan in Peter ed in Hans sco possessurs da feuds episcopals, il 1421 a Ramosch in Jacob von Port ed il 1464 in Peter sco chastellan e derschader sin il chastè da Tschanüff. Il 1464 è doc. in Paul Conradin sco administratur austr. sin il chastè da Tarasp. A Cuira cumpara la schlatta per l'emprima giada il 1439 cun il chancelier episcopal Nicolaus de la P.; Johannes de la P., numnà Byaesch, era il 1477 burgais da Cuira ed administratur da la claustra dals predicaturs. Ulteriuras lingias da la fam. eran domiciliadas en il 15. e 16. tsch. a Tavau, Scuol, Sent e Landeck.
Da la lingia da Cuira occupava il custodi catedral Franciscus ina posiziun impurtanta. El aveva studegià a Vienna ed era stà il 1499, en il temp da la Guerra svabaisa, in dals quatter regents da l'uvestgieu e cuss. da guerra. Medemamain da la lingia da Cuira derivan l'uv. Beatus, elegì il 1565, e ses frar Caspar, maiordom episcopal il 1575 e chapit. episcopal sin la Fürstenburg il 1578. Da la lingia da Ftan derivan dal 1557-1889 en tut 15 plevons ref., tr. quels Nott, ch'ha edì set ovras rum. ed ina «Chronica Rhetica», e Peter Dominicus Rosius. La scola privata, fundada il 1794 dad Andreas Rosius a Ftan en il spiert filantropin, ha existì fin viaden il 19. tschientaner.


Archiv:
ASGR.

Litteratura:
J.C. Muoth, Zwei sogenannte Ämterbücher des Bistums Chur aus dem Anfang des XV. Jahrhunderts, 1898; Grimm, Aristokratie; Clavadetscher/Meyer, Burgenbuch, 61, 65, 205, 213.

Martin Bundi

lemma precedents Porclas [Porclis]Porta, Andreas Rosius à lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :