e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Madulain
Vischnanca polit., cirq. Engiadin'Ota, distr. Malögia. La pli pitschna da las 11 vischnancas da l'Engiadin'Ota. Vitg a mantun situà a 1684 m a la riva da l'En sin in cugn alluvial da l'Ova d'Es-cha. 1137/39 Madulene, fin il 1943 tud. Madulein (uffiz.). 1806 93 abit.; 1850 63; 1900 54; 1950 77; 1980 94; 2000 180. Il 1979 han ins scuvert ina deponia da vigliaunas dal temp da fier tardiv. Sin in grip abrupt sur il vitg sa chatta la ruina da la fortezza da Guardaval, construida enturn il 1250 da l'uv. da Cuira, Volkard von Neuburg; en feud tar la fam. Planta il 1377. Il cumplex n'è dentant mai stà abità ed è vegnì bandunà gia en il 15. tschientaner. Il 1543 è M. sa separà politicamain da Zuoz ed è daventà in vischinadi autonom. L'emprima menziun d'ina baselgia en il vitg datescha dal 1370. Enturn il 1510 è vegnida construida la baselgia dal vitg en stil gotic tardiv; il 1554 è la vischnanca aderida a la Refurmaziun. La chaplutta bandunada da S. Baltramieu sa chatta al cunfin cun la vischnanca da Zuoz. Construcziun d'ina ovra electrica 1906 e da numerusas residenzas secundaras a partir dal 1970. Scolas a Zuoz. Meglieraziun generala 1982-97. Il 2005 lavuravan 48% da la populaziun cun activitad da gudogn a M. en il sectur secundar e 25% en il sectur terziar. A M. vegn discurrì rum., tud. e talian. Part da la populaziun da lingua rum.: 2000 22,1%/42,8% (ML/Lindic).
Litteratura:
Kdm GR 3, 339-43; A.C. Zürcher, Urgeschichtliche Fundstellen Graubündens, 1982, 50; M. Caviezel, M.: ein Dorf im Oberengadin, 2000.
Constant Wieser
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Madritscha