e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Mastrils
Vischnanca polit., cirq. Tschintg Vitgs, distr. Landquart (fin il 2000 Landquart Sut). Abitadi sparpaglià sin la spunda dal Calanda, cun ils aclauns dad Isla, Punt da Tardis e Trätsch. 1318 Ponstrils, 1345 Bastrils. 1850 460 abit.; 1900 322; 1950 433; 1970 464; 1990 585; 2000 529. Colonisà da Rumantschs en il temp autmedieval, alura da Gualsers a partir dal 14. tsch. ed alemanisà en il 15. tschientaner. Sin il champ politic ed ecclesiastic era M. ina part da Zezras. Fin il 1554 ha existì ina cuminanza da pastgira d'alp cun Vaz Sut. Il 1526 èn vegnids cumprads ora ils dretgs feudals da Marschlins, il 1568 quels da l'uvestgieu da Cuira ed il 1577 quels da l'abazia da Faveras. Il 1854 è M. daventada ina vischnanca autonoma. Dapi il 1610 vivan era ref. a M.: la baselgia ref., construida il 1613-14, è passada durant ils Scumbigls grischuns als cat. ed è vegnida consecrada a s. Maria da la Victoria. Il 1644 è ella vegnida restituida als ref.; dapi il 1840 vegn ella pastorada davent da Fläsch. La baselgia cat. da S. Antoni, construida il 1686-88, è sa separada il 1727 da Zezras ed è daventada ina plaiv independenta, pastorada da chaputschins. M. dispona d'in impurtant sectur forestal, da pauca activitad industriala e d'in runal da skis. Consorzi da scola cun Landquart. Il 2005 offriva il sectur terziar la mesadad da las plazzas da lavur, il sectur primar la plipart da l'autra mesadad.
Litteratura:
Kdm GR 7, 387-89; Bundi, Besiedlung; Gem. GR, nr 90, 1985; Gem. GR, 2003, 196 s.
Adolf Collenberg
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Mastral