e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Chanzun spirituala rumantscha Chapitani da mats  Chapella Ospizi e chaplutta en la vischn. polit. da S-chanf, erigì da la plaiv gronda da Zuoz enturn il 1250 en vischinanza da la chaplutta da S. Niclà a l'entrada en la Val Susauna, a la cruschada da la via da sauma Tavau - Engiadina/Buorm. L'edifizi originar aveva in plaun. Avant il 1300 han ins agiuntà dormitoris ed en il 14. tsch. engrondì il vestibul ed il refectori per in plaun. Enturn il 1530 èn suandadas duas stivas goticas per l'administraziun. L'ospizi vegniva pastorà oriundamain da fraters predicaturs da Com (prob. emprima residenza dominicana en Svizra). Pli tard è el vegnì transfurmà en ina chasa da paupers e malsauns da Chamues-ch, Madulain, Zuoz e S-chanf. A la fin dal 18. tsch. è quella vegnida serrada ed è alura passada sco bain rural als Perinis. Dapi il 1967 sa chatta a C. la Fundaziun C., in center da furmaziun per giuvenils. La chaplutta da S. Niclà, menz. il 1209 (cunpatrun S. Duri, 1285), è vegnida erigida prob. en il 11. tsch. sco baselgia romanica cun sala, apsida radunda ed ina bella tur (mantegnida). Il 1524 è ella vegnida amplifitgada en stil gotic tardiv (chor, tabernachel, sacristia). Utilisada sco baselgia dals refurmads da Cinuos-chel e Susauna fin viaden il 18. tsch., è la chaplutta alura ida plaun a plaun en decadenza (conservada dapi il 1981 suenter perscrutaziuns archeologicas). Fundaziun da la Societad Open Air C. l'onn 2000. Litteratura: Kdm GR 3, 396-98; C. Simonett, Ein Urkundenfund zum Hospiz in Chapella bei S-chanf [...], en: BM, 1965, 292-316; R. Arquint, Ospiz C., 1993. Constant Wieser  Chanzun spirituala rumantscha Chapitani da mats  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: