e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Fuond Furca, Pass dal  Fuorn, Pass dal Passagi a 2149 m che maina da Zernez en l'Engiadina Bassa tras il Parc Naziunal Svizzer a Tschierv en Val Müstair, ist. Cuolm d'Fuldera, tud. Ofenpass. Impurtanta colliaziun ost-vest. Il Pass dal F. sbucca directamain da l'Engiadina Bassa en la veglia Via Claudia (Pass da Raisch) e cunquai en la ruta classica per Vaniescha. L'ospizi vegn numnà Süsom Givè. Il num F. deriva dal lat. furnum, rum. furn (da luentar), fundaria, e renviescha, sco il num local Fuldera, a l'intensiva industria da minieras pratitgada en questa regiun durant il temp medieval tardiv. Enturn il 1499 vegniva il F., frequentà gia en temps preistorics, numnà pass uff Faldieren. L'impurtanza strategica da quest passagi en la Currezia è prob. stada in dals motivs per la fundaziun da la claustra da Müstair enturn l'onn 800. Ad Il F., a Buffalora ed a Sassalb avev'ins erigì simpels albierts il 1490 resp. il 1539. In'emprima regulaziun da l'organisaziun dal traffic sur il F. datescha dal 1544. A l'entschatta dal temp modern existiva, sper il traffic da sauma, era gia in traffic da chars sur il F. Vers il nord vegniva transportà tr.a. graun, vin, fier, arom e sal. En la cunvegna tr. il cumin d'Engiadin'Ota, responsabel per las relaziuns da traffic, ed il vischinadi da Zernez, è quest ultim s'obligà da mantegnair la via sur il F. fin al cunfin territorial dal pass e da tegnair quella averta era durant l'enviern. Per recumpensa ha Zernez obtegnì il dretg d'incassar ina taxa da transport. Il 1563 han il cumin d'Engiadin'Ota ed il vischinadi da Tschierv stipulà in contract sumegliant per ina durada da 20 onns, tenor il qual ils da Tschierv èn s'obligads da transportar la martganzia da Sta. Maria fin Süsom Givè. Tr. il 16. ed il 19. tsch. ha il F. giugà ina rolla marginala en cumparegliaziun cun ils passadis nord-sid principals dal Grischun (Güglia, Set, Spleia). Fin en la segunda mesadad dal 19. tsch. circulava il traffic sur il F. sin ina simpla via da sauma e per chars da duas rodas. Ina emprima amplificaziun da la via dal F. ha permess a partir dal 1864 d'installar in curs postal regular per il transport da persunas cun charrotschas stretgas che circulavan la stad trais giadas l'emna da Müstair a Zernez e viceversa. Suenter che la Confed. era sa declerada pronta da sustegnair pliras vias alpinas sco implants d'impurtanza militara, è la via dal F. vegnida amplifitgada il 1870-72 da Zernez fin al cunfin svizzer tr. Müstair e Tuer. Il 1922 ha la posta mess en circulaziun ils emprims autos postals, ils emprims onns mo durant trais mais, il 1927 durant in mez onn ed a partir dal 1934 durant l'entir onn. A partir dal 1906 ha in comité planisà la construcziun d'ina viafier a binari stretg da Zernez sur il F., cun colliaziun a la Viafier dal Vnuost. Il 1909 ha la Confed. approvà il project, per mancanza da daners en ils onns da guerra e da crisa economica n'ha quel dentant betg pudì vegnir realisà. Funtaunas: RQGR I/1, 88, 223. Litteratura: F. Manatschal, Von der projektierten Ofenbergbahn, 1918; IVS GR, 65. Martin Bundi  Fuond Furca, Pass dal  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: