e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Clavenna
Citadina tal. a la sbuccada da la Bergiaglia en la Val S. Giachen, center da la Val Clavenna che furma cun la Vuclina l'actuala provinza da Sunder, tal. Chiavenna (uffiz.), tud. Cläven/Kleven (ist.). L'antica C., doc. en l'«Itinerarium Antonini» ed en la «Tabula Peutingeriana», è vegnida conquistada l'onn 16 a.C. da las truppas d'Augustus e colliada cun Cuira sur il Spleia d'ina vart e sur il Set resp. il Malögia e Güglia da l'autra vart. Il contadi da C. è sa constituì prob. en il decurs dal 10. tsch., a l'entschatta dal domini saxon dad Otto I ch'ha attribuì la Bergiaglia l'onn 960 da Villa ensi a l'uvestg da Cuira, determinond qua tras il cunfin anc oz existent tr. l'Italia e la Svizra.
Il 1030 era C. gia ina citadina. En il 12. tsch. ha ella obtegnì benefizis e privilegis grazia a las bunas relaziuns cun l'imp. Friedrich I Barbarossa. Igl è stà propi a C. che l'imperatur ha dumandà, a la vigilgia da la Battaglia da Legnano (1178), invanamain agid militar a ses cusrin Heinrich il Liun, duca da Baviera e Saxonia. Da quel temp ha l'uvestg da Cuira revenditgà per l'emprima giada il territori da C., suttamess a l'uvestg da Com; il 1178 è el s'avanza vers il sid da las Alps fin a Plür. Il 1335 è C. passà, ens. cun il territori da l'uvestgieu da Com, als Viscontis da Milaun. L'imp. Ludwig il Bavarais e, diesch onns pli tard, era il retg Carl IV da la Boemia han ordinà, senza success, l'annexiun dal contadi da C. a l'uvestgieu da Cuira. Durant tut il 15. tsch. èn las vals da C. stadas infeudadas als Balbianis da Varenna. Il zercl. 1486 era entrada in'armada grischuna, ch'aveva profità da l'appel dal papa Innocenz VIII da cumbatter ils Sforzas, successurs dals Viscontis a Milaun, en la Val S. Giachen ed a Plür ed era sa retratga pir suenter avair sblundregià e mess C. en tschendra. Il favr. 1487 avevan empruvà ils Grischuns d'entrar cun 600 umens dal Spleia, da la Bergiaglia e da Piattamala (Puschlav) en Vuclina, ma senza success; els eran percunter reussids da penetrar da Livign en la Val da l'Adda e da batter ils Vuclinais sper Sunder. Il duca da Milaun, Ludivic il Mor, è vegnì en agid ed ha laschà construir tr. il 1488 ed il 1492 mirs da fortezza enturn C. ed ils centers principals da la Vuclina, cun l'agid finanzial da las communitads dal contadi. Quests mirs èn dentant daventads obsolets gia il 1512, cura che la citadina da C. e la val èn passadas, suenter 12 onns sut domini despotic franz., a las Trais Lias ch'han pudì spustar lur cunfins al sid dal sparta-auas, s'unir als alliads venez. e prevegnir al privel d'invasiuns a l'improvista. Entant ch'ils lieus confederads svizzers sustegnevan il papa Julius II e la Lia sontga, ha l'armada da la LCD, cumandada da Conrad von Planta, assaglì la citadina da C. ils 22-5-1512, e las armadas da las duas autras Lias grischunas èn entradas en Vuclina. Sis mais pli tard è vegnì conquistà il chastè da C.
Il contadi da C. era dividì en trais giurisdicziuns, numnadamain en quellas da C. (cun in cumissari), da Plür (cun in podestat) e da la Val S. Giachen. Il cumissari da C. ed il podestat da Plür èn vegnids delegads da las Trais Lias per mintgamai dus onns sco derschaders. La giurisdicziun da C. cun sias sis vischnancas aveva, sco quella da Plür, in cussegl ordinari secret ed ina giunta cun in console (correspundent al mistral) a la testa, tschernì dal cussegl general. La Val S. Giachen, ch'aveva privilegis particulars, era dividida en dudesch quartiers (reducids a trais il 1650); ella disponiva d'in cussegl general e d'in cussegl da vallada, presidià d'in ministrale responsabel per ils cas civils, entant ch'ils cas criminals vegnivan giuditgads dal cumissari da C., assistì d'assessurs indigens. En quest temp èn sa rinforzads ils ports, associaziuns localas ch'avevan il monopol en il transport da martganzia sur il Spleia. A partir dal 1436 ospitava C. ina fiera internaz. durant la curaisma ed ina pli pitschna il di da S. Andrea (30 da nov.) Numerus preditgants tal., persequitads da l'Inquisiziun sco eretics, èn fugids a C. suenter la Refurmaziun. Suenter l'Edict da Glion dal 1557 han trais baselgias da C. midà al cult divin protestant, ens. cun autras baselgias a Prata, Mese e Plür, nua ch'ins ha salvà in disput teologic il 1597. En ils dus decennis turbulents suenter il Murdraretsch en Vuclina (1620), en il qual C. n'era betg involvì, han la Spagna d'ina vart e Vaniescha, il Grischun e la Frantscha da l'autra vart cumbattì per la supremazia sur C. e la Vuclina. A partir dal zercl. 1629 han mercenaris purtà la pesta en la regiun. Il Capitulat da Milaun dal 1639 ha decretà il return da las Trais Lias, admettond sulettamain la cretta cat. e scumandond, cun pauc effect, als protestants esters da sa domiciliar en la val.
Alura è suandà in tschientaner da quietezza, durant il qual ins ha puspè reconstruì las baselgias da la citad e dal contadi, erigì ulteriuras baselgias sin las collinas fermamain populadas e fundà duas claustras a C. Il 1715 han ils Austriacs substituì ils Spagnols en il ducadi da Milaun ed han stipulà il 1762 in contract cun il Grischun (Terz Capitulat da Milaun, en vigur 1763), en il qual in artitgel secret tolerava il domicil dals protestants, en cuntradicziun cun il Capitulat suttamess als cumins. Cunter las potentas fam. grischunas sco ils Salis, che controllavan l'economia indigena, hai dà grondas protestas a chaschun da las dietas. Il 1797 èn C. e ses contadi vegnids attribuids a la Republica cisalpina. Suenter la sconfitta da Napoleun han ils Grischuns empruvà, senza success, da reconquistar la Vuclina. Il 1815 ha il Congress da Vienna incorporà il contadi en il reginavel lumbard-venez., occupà dals Austriacs ch'han laschà construir la nova via sur il Spleia il 1818-22. Pauc pli tard ha inizià il svilup industrial a C. cun la fundaziun da bierarias e da filandarias da mangola. Il 1835 aveva C. 10 interpresas da spediziun che transportavan martganzia per 40'000 quintals l'onn, surtut sur il Spleia. En las tschintg fieras dal contadi han ins vendì il medem onn 1'400 arments indigens ed 800 grischuns, 150 chavals indigens e 100 grischuns. Il 1859 è la citadina da C. vegnida attribuida, ens. cun il contadi, al Reginavel d'Italia. Dapi il 1838 existan plans per in tunnel dal Spleia, ins ha dentant preferì il Piemunt. La val è dividida actualmain en 13 vischnancas politicas, ed ils interess intercommunals vegnan affidads dapi il 1973 a la Comunità montana della Valchiavenna.
Litteratura:
E. Besta, Storia della Valtellina e della Val Chiavenna, 1955²; G. Scaramellini, Chiavenna: appunti di storia, 1980; D. Benetti, M. Guidetti, Storia di Valtellina e Valchiavenna, 1990.
Guido Scaramellini
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Clavadetscher, Otto Paul