Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Sessiun evangelicaSevgein lemma sequent

Set, Pass dal
Passadi a 2310 m che collia Beiva en il Surses cun Casaccia en la Bergiaglia, tal. Passo del Settimo, tud. Septimerpass. Entsch. dal 13. tsch. Setmunt. Gia per il temp da bronz è attestà in traffic commerzial tras il Surses e sur ils pass alpins. L'«Itinerarium Antonini», in register da las vias stabilì a la fin dal 3. tsch. s.C. a basa da doc. pli vegls, menziunescha in tschancun tr. las staziuns da Tinnetione (Tinizong/Surses) e da Muro (prob. Müraia/Promontogno) che correspunda cun gronda probabilitad a la ruta dal S. resp. dal Güglia. Ina cultura cun chats dal temp rom. tempriv, scuverts sin il S., cumprova ch'il pass vegniva frequentà durant il temp roman. Sin fundament da ruderas e d'in tschancun da via taglià en il grip, scuverts sin la spunda sid dal pass, presuppona Armon Planta ch'il S. saja vegnì frequentà gia en il temp rom. cun chars. La perscrutaziun moderna è però sa distanziada da quell'ipotesa, tant pli ch'ils fastizs al S. pon strusch persvader, surtut en cumparegliaziun cun quels al Pass dal Güglia.
L'«Urbari curretic dals bains imperials» (ca. 840) menziunescha a la ruta dal S. in albiert a Murmarera, ina stalla al spartavias a Beiva ed ina duana a Castelmur. Igl è intschert, schebain il Xenodochium sancti Petri, attestà en la medema funtauna, correspunda a l'ospizi dal S. Enturn il 1100 èn doc. in nov ospizi ed ina nova chaplutta al S. Dapi l'onn 960 controllava l'uvestg da Cuira il S. sco era las vias d'access al nord ed al sid dal pass; il retg Otto I aveva cedì ad el la Bergiaglia cun la duana. Il 1209 ha il retg Otto IV liberà ils servs e la servitid da l'ospizi da l'obligaziun da pajar taglias e da dar albiert, accentuond qua tras l'impurtanza dal S. ch'è stà il pass grischun il pli impurtant dal temp autmedieval fin viaden ils onns 1470. A partir dal 12. tsch. èn arrivads Bregagliots sur il S. a la tschertga da nov territori da colonisaziun ed han occupà il stgalim sura dal Surses. Era la senda da la Val d'Avras sur il Forcellina (2672 m), orientada vers il sid fin en il 19. tsch., manava a l'ospizi sin il S. ch'ha existì prob. fin viaden il 16. tschientaner. Il 1359 ha l'uv. Peter I Gelyto obtegnì da l'imp. Carl IV in mandat che scumandava a las citads imperialas da duvrar auters pass che quel dal S. Il 1386 han commerziants milanais tschertgà  ina ruta da guntgida al Gottard ch'era daventà malsegir en consequenza da las Guerras da Sempach. Il 1387 ha l'uv. Johannes II Ministri obligà Jacob de Castelmur da construir ina via da salaschada da Tinizong a Plür, adattada per chars cun chargias da fin a 36 rups (ca. 300 kg u duas chargias e mez da sauma); Castelmur ha obtegnì per recumpensa il dretg d'incassar ina taxa da via. Ma il S. para d'esser daventà prest puspè ina via da sauma. Cun la construcziun da la Viamala (1473) è sa spustà il traffic da transit da la Via Sura (S. e Güglia/Malögia) a la Via Sut (Spleia e S. Bernardin), privond il S. da sia impurtanza originara. Crudadas da crappa, bovas e lavinas han rendì savens nunpussaivel il passadi dal S., surtut da la vart sid dal pass.
Dal traffic da martganzia sur ils pass s'occupavan ils ports. Il transport sur il S. vegniva garantì dal port da Stalla (Beiva e Murmarera) e da quel da la Bergiaglia superiura. En il temp modern han ins alura transportà dapli rauba sur il Spleia ed il S. Bernardin che sur il S. ed il Güglia. Suenter il 1820 è vegnida construida ina nova via sur il Güglia ed il Malögia, avrind surtut l'Engiadina al traffic da transit. Projects per ina via ed ina viafier sur il S. n'èn mai vegnids realisads. Durant l'Emprima Guerra mundiala èn arrivads ulteriurs purs da la Bergiaglia sur il S. ed èn sa domiciliads en la vischnanca da Beiva uffizialmain da lingua taliana.


Litteratura:
Planta, Verkehrswege 2, 67-93; J. Rageth, Römische Verkehrswege und ländliche Siedlungen in Graubünden, en: JHGG, 1986, 46-55; HbBG 1, 142-44, 239-41; 2, 63-67; 3, 63-65; J. Rageth, Römische Strassen- und Wegreste im bündnerischen Alpenraum, en: Über die Alpen, 2002, 59-65; J. Rageth, Alte und neue Beobachtungen zur römischen Julier-/Septimerroute, en: BM, 2007, 267-96; SO, 3-8-2008; I.H. Ringel, Der Septimer, 2011.

Jürg Simonett

lemma precedents Sessiun evangelicaSevgein lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: