Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents StelzfussStierva lemma sequent

Stielva, Pass dal
Passadi a 2757 m che collia il Vnuost Sura tal. (S. e Prad) cun la Vuclina (Buorm), tal. Giogo dello Stelvio, tud. Stilfserjoch. Il S. para d'avair servì gia en il temp autmedieval da guntgida al Pass da l'Umbrail (traffic regiunal e barat commerzial sporadic). Cun l'existenza da fieras a Müstair (1239) e Gluorn (1290) è creschì il traffic commerzial. Enturn il 1319 ed il 1328 ha accordà il cont e duca tirolais Heinrich a la plipart da las citads commerzialas en la Lumbardia il privilegi da laschar transportar la martganzia sur Buorm vers il nord; sco via da sauma vegniva plitost en dumonda l'Umbrail ch'il S. La martganzia sa constituiva da sal dad Alla e da ponn grisch (carpun) che vegnivan transportads vers il sid e da vin transferì vers il nord. Suenter l'incorporaziun da la Lumbardia a l'Austria il 1815 vuleva quella realisar, per motivs strategics, ina via directa dal Tirol en la Lumbardia. Ina tala è vegnida construida il 1819-25 sut la direcziun da l'inschigner da Brescha, Carlo Donegani, ch'ha era realisà la via dal Spleia; cun ina largezza da 7-8 m e numerusas construcziuns d'art è stada quella via in'ovra temeraria. Dapi il 1-8-1825 circulava durant la stad ina posta da chavals austr. da Buorm a Stielva en la Val Trafoi. Dal 1869-76 ha garantì la posta svizra - ad agen quint, ma subvenziunada da la posta tal. - ina posta da chavals da Colico (Lai da Com) a Buorm, nua ch'ils passagiers avevan alura coincidenza a la posta sur il S. Il 1848 ed il 1859 èn stadas staziunadas truppas militaras sin il S. Il 1915-18 èn sa cumbattidas armadas tal. ed austr. sin il S., entant che truppas svizras protegivan ils cunfins naziunals. Suenter la construcziun da la via da l'Umbrail ha installà la Svizra il 1913-14 ed il 1922-27 ina posta da chavals da Sta. Maria en Val Müstair fin al S. A partir dal 1927 èn circulads sin quest tschancun da via autos postals, cun in'interrupziun en ils onns 1940-46. Il S. serva oz mo pli al traffic turistic e giauda durant la stad in viv traffic da sport da skis. 


Litteratura:
O. Stolz, Das Wormser- und Stilfserjoch in der Verkehrsgeschichte, en: Der Schlern, 1954, 493 s.; J. Gartmann, Kehrenreicher Umbrail und Stelvio, en: TG, 1987, nr 3, 20-23; G.K. Pinggera, Geschichte der Stilfserjochstrasse, en: C. Gustin, 100 onns stradun sur l'Umbrail, 2001.

Martin Bundi

lemma precedents StelzfussStierva lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :