e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Pigniu
Vischnanca polit., cirq. Rueun, distr. Surselva (avant il 2001 Glogn), situada a 1288 m al pe dal Veptga al cunfin cun il Glaruna. 1403 Pingyow. Il num tud. Panix (uffiz. fin il 1943) cumpara sper il num rum. dapi il 1522. 82% dal territori comm. vegnan utilisads da l'Alp Ranasca che appartegna a la vischnanca burgaisa da Domat. 1850 70 abit.; 1900 61; 1920 87; 1950 78; 2000 45. P. era evtl. ina culegna averta dals d'Andiast a la veglia transversala da las Alps dal Glaruna al Lucmagn. La baselgia da S. Valentin, consecrada il 1465, ha constituì in lieu da pelegrinadi retschertgà en il 17. tsch.; ella è stada subordinada a Rueun fin il 1667, dapi alura furma P. in'atgna plaiv. Dals 6 als 7 d'oct. 1799 è P. vegnì sblundregià da l'armada russa da Suvorov arrivada sur il Veptga. La via chantunala tr. P. e Rueun è vegnida construida pir en ils onns 1921-23. Dapi il 1992 exploteschan las OE Glion SA (avant OENO) forza electrica dal lai da fermada da P. che sa chatta per 40% sin territori d'Andiast. La vischnanca da muntogna tradiziunala n'ha nagin mastergn, nagina butia e dapi il 2008 nagina posta. La scola è vegnida serrada il 1971 (scola a Rueun). Dal 1970 fin la fin dals onns 1980 è P. vegnì sustegnì da la vischnanca da Schlieren/ZH (vischn. da padrinadi). Part da la populaziun da lingua rum.: 2000 91,1%/100% (ML/Lindic). Meglieraziun gen. 1910.
Litteratura:
Panix, en: Das Schweizer Dorf, edì dad E. Winkler, 1941, 217-42; Kdm GR 4, 299-301; Gem. GR, nr 109, 1982; Cudischet da P., 2006; SO, 30-11-2010.
Adolf Collenberg
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Pignia