e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Porclas [Porclis]
Portals, saivs u mirs da serra en stretgas da la val a Trin e Cumbel. Il toponim deriva dal lat. portula e cumpara era a Scharons, Vaz ed en il Mesauc.
A Trin designescha il num Porclis (a 868 m) ina gruppa da chasas ed in'anteriur portal da defensiun situads al stradun al vest da la vischnanca en ina foppa tr. il Bot Fiena ed il Crap S. Barcazi (a 1009 m). Il portal a Porclis era prob. en il temp medieval tempriv ina part da la culegna fortifitgada sin la collina da S. Barcazi ed in post da controlla dal traffic che passava questa stretga. A Porclis alimentava in conduct d'aua, suspendì al Crap Ueara (attestà anc en il 17. tsch.), in bigl e traversava il stradun per transportar l'aua a Digg e conturns.
A Cumbel designescha il num P. (a 1019 m), localisà al stradun 1 km al sid dal cunfin communal cun Luven, il cunfin tr. ils cirquits da la Lumnezia e da la Foppa. A P. existiva antruras prob. ina serra da la val. Il portal anc oz existent (construì prob. enturn 1300, restaurà il 1858 ed il 1912) ha in artg a piz e pudeva vegnir serrà cun duas alas. La stretga vegn era numnada Porta da femnas, sa referind a la legenda, tenor la quala las dunnas lumnezianas duain avair cumbattì qua ils 12 da matg 1352 cunter ina truppa dal cont de Werdenberg en la Faida da Belmont.
Litteratura:
Kdm GR 4, 152; Clavadetscher/Meyer, Burgenbuch, 34, 95.
Martin Bundi
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Populaziun