e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Missiun populara catolica
La missiun populara cat. è ina furma da pastoraziun extraordinaria che provegn da la pastoraziun gesuita. Ella ha servì en las plaivs cat. ad approfundar e renovar la cardientscha e la vita cristiana ed a reactivar ils cartents daventads passivs. La missiun populara cat. ha cuntanschì ses zenit tr. il 1850 ed il 1960, in temp durant il qual ella è sa splegada en tut las plaivs cat. en intervals regulars da diesch onns e dapli. En sia structura d'organisaziun suandava ella in muster pli u main unitar che consistiva en la missiun da l'entira plaiv entaifer otg dis u en la missiun da la plaiv tenor stans socials (uffants, dunnas e giuvnas, umens e giuvens) entaifer 14 fin 18 dis. En quel temp proclamavan mintgamai dus fin trais missiunaris las vardads da la cardientscha cat.-rom. en predis, referats, devoziuns e festivitads liturgicas ed intimavan ils cartents da retschaiver ils sacraments. Suenter il Segund Concil vatican (1962-65) è la missiun populara cat. vegnida remplazzada tras autras furmas da pastoraziun sco las emnas da cardientscha, adattadas als basegns moderns d'ina pastoraziun basada sin il dialog. En la missiun populara cat. grischuna eran activs surtut chaputschins, ma era paders d'autra observanza.
Litteratura:
HS VII, 460 s.; P. Geiger, Volksmission - "fabrikmässig betriebene Seelenfängerei"?, en: Katholische Denk- und Lebenswelten, edì dad U. Altermatt, 2003, 67-84; M. Bearth, Tochen ch’ei deva regularmein missiun tier nus, en: Cal. Rom., 2005, 381-90.
Franz Xaver Bischof
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Miserias