e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Patrocinis
Il term patrocini designescha en la baselgia cat. la protectura tras in patrun (p.ex. s. Peder u s. Antoni) u ina patruna (p.ex. s. Maria u s. Gada), sut la quala vegn messa ina instituziun (baselgia, ospital e.a.). Sche baselgias èn consecradas ad in misteri da la cardientscha (p.ex. a la s. Trinitad, a la s. Crusch, al Cor da Jesus, al s. Spiert), celebrescha la plaiv, enstagl dal patrocini, ina festa titulara. Cun il patrun u la patruna ha ina plaiv ina relaziun tut speziala, o.t. sch'in martir u in missiunari cristian tempriv è vegnì sepulì en la baselgia respectiva (p.ex. s. Plazi/claustra da Mustér, s. Flurin/Ramosch). Per autras baselgias han las plaivs tschernì in patrun ed han deponì sche pussaivel reliquias (restanzas) dad el en la baselgia. Da quella pratica è naschì l'usit da metter l'edifizi da la baselgia e da la plaiv sut la protecziun dad in u da plirs sontgs e da celebrar la festa annuala dal sontg u da la sontga a moda particulara - la famusa "perdunanza" (dal lat. *perdonantia/perdonare, rum. perdunar) -, il pli savens cun ina processiun. Il patrocini d'ina baselgia po midar. En tscherts temps devi veritabels "sontgs da moda", tenor ils quals numerusas baselgias èn vegnidas numnadas, p. ex. Bistgaun en il 16. tsch. e Maria en il 17. tschientaner. Ils patrocinis ils pli derasads en il Grischun èn Maria, Anna, Antoni, Gieri, Gion Battista, Luregn, Martin e Bistgaun.
Litteratura:
LThK 7, 1480 s.; F. Koch, Verzeichnis der Kirchen- und Kapellenpatrozinien des Kantons Graubünden, 2000.
Adolf Collenberg
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Patriziat