e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Plaz, Bonifazi Pleif  Plazza d'armas Cuira Cumpiglia il Rossboden, stabiliments en la citad da Cuira (ca. 170 ha) e la plazza da tir per chars armads a Zapport/Valragn (ca. 10 km²), cumprada il 1965 ed en diever dapi il 1975. Il reglament militar dal 1817 aveva suttamess il militar als chantuns, resalvà l'inspecziun federala. Il 1818-20 ha la citad da Cuira construì ina caserna sin l'areal dal Rossboden ed endrizzà quel sco plazza per exercizis militars e da tir. Il 1839/40 ha il chantun Grischun cumprà l'entir areal ed erigì sin quel la caserna veglia; quella dal 1820 è vegnida transfurmada en in'arsenal (ars giu il 1859). Il 1840 ha gì lieu sin il Rossboden l'emprima scola da recruts (40 dis) e dapi il 1887 è il Rossboden ina plazza fed. d'armas. Il 1863 è vegnì construì il nov arsenal al lieu da l'odiern edifizi dal Cussegl grond e dal Teater da citad, il 1878 il magasin da muniziun sin la Halbmyl. La caserna nova, concepida da l'architect Johannes Ludwig per in battagliun da recruts cun in chantunament provisoric ed ina stalla per 50 chavals, datescha dal 1882. Il 1915 ha la Confed. laschà eriger sin il Rossboden l'arsenal nr 4, il 1918 ils arsenals nr 5 e 6 ed il 1965 l'arsenal nr 7 a la Obere Au. Il 1921 aveva ella acquistà ils arsenals da Cuira ed il 1947 cumprà l'entira plazza d'armas. L'avust 1943 ha il militar incendià per accident 700 ha guaud al Calanda. Ils arsenals actuals nr 1 e 2 e l'edifizi d'administraziun sper la caserna dateschan dal 1949-51, il deposit d'autos militars dal 1951 (sanà il 1981-82). Ina sanaziun parziala da la caserna ha gì lieu il 1948, ina renovaziun totala ed amplificaziun da la caserna e da l'areal il 1973-75. La plazza d'armas ha ina grond'impurtanza economica per Cuira. Enturn il 1980 è ella vegnida utilisada da quatter scolas da recruts ed ha mess a disposiziun sia infrastructura per numerus curs cun in total da ca. 160'000 pernottaziuns (l'onn 2000 ca. 79'000). Reducziun considerabla en consequenza da la refurma d'armada XXI (2004). Actualmain (2010) sa chattan tut las plazzas d'armas naz. en ina fasa da restructuraziun (era quellas da defensiun cunter aviuns a Breil, dapi il 1945, ed a S-chanf, dapi il 1949). Litteratura: BT, 24-8-1982; R. Bornatico, 100 Jahre Waffenplatz Chur, 1882-1982, [1982]; P. Joos, Chronik über die Entwicklung des Waffenplatzes Chur [...], 1982; C. Hildebrandt, Die Zeughäuser in der Schweiz: die Armeefahrzeugparks, 1993, 127-31. Adolf Collenberg  Plaz, Bonifazi Pleif  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: