e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Pro Raetia
Organisaziun da tetg da las uniuns grischunas en la Bassa, fundada ils 22-5-1949 a Lucerna, politicamain e confessiunalmain neutrala. Spiritus rector ed emprim pres. è stà Balz Fetz da Domat, domicilià a Basilea. La Pro Raetia è organisada tenor il princip da la secziun administrativa, dapi il 1998 cun ina suprastanza centrala a Cuira. La finamira primara era da concentrar las forzas e coordinar l'agid caritativ ed economic en favur dal Grischun. Dapi il 1953 è era represchentada la Regenza grischuna en la suprastanza centrala. En consequenza dal svilup economic e social dal Chantun suenter il 1960 è la Pro Raetia sa concentrada sin la promoziun da la cultura. Il 1964 ha ella avert in fond da donaziuns en favur d'instituziuns socialas. Dapi il 1970 salva la Pro Raetia annualmain ina dieta champestra, deditgada mintgamai ad in tema d'impurtanza per ina u pliras da sias organisaziuns affiliadas: economia, protecziun da la natira, convivenza linguistica, occupaziun e tgira da persunas cun impediments ed auter pli. En il context da questas dietas èn vegnidas fundadas pliras uniuns specificas, p.ex. la Pro Vrin (1977), l'Uniun Spazi cultural Viamala (1992) u il Forum economic dal Grischun (1995). L'olma da la Pro Raetia è stà durant decennis Christian Walther, secretari a partir dal 1954 e redactur da la «Terra Grischuna», l'organ uffizial da la Pro Raetia. Comm. 2010: 615 persunas, 22 interpresas, 46 vischnancas e 22 uniuns grischunas.
Litteratura:
TG, 1999, nr 2, 49; 2009, nr 2, 47 s.
Adolf Collenberg
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Pro Natura Grischun (PNG)