e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Schmid von Grüneck [de Carniec], Martial Anton Modest (de Bubretsch)
* 10-4-1802 a Sumvitg, † 23-3-1863 a Surrein, cat., da Sumvitg. Figl da Gion Antoni e da Maria Brida n. (de) Contrin, da Sumvitg. ∞ Maria Magdalena Carolina n. Crufer, da Domat. Mercenari en Frantscha 1818-30. Domicilià suenter il 1832 a Cuira, nua ch'el è stà uffizier da propaganda dal regiment papal svizzer. Confundatur da l'Uniun per meglierar las scolas rum. e da la Societad per la promoziun da l'agricultura e da l'industria, per la quala el ha scrit il 1836 la «Historia da Gion actif» (per l'ultima classa primara), in entruidament progressiv per purs futurs. Mulissier impurtant en favur da l'elecziun da Johann Georg Bossi sco uvestg da Cuira e per la separaziun da l'uvestgieu dubel da Cuira e da S. Gagl. Enturn il 1840 è S. stà cumandant d'ina cumpagnia da grenadiers en servetsch dal papa; suenter div. battaglias manadas en la Lumbardia cunter l'Austria, è el vegnì numnà dal papa chavalier il 1848. Il 1849 è S. sa domicilià a Surrein, e dal 1855-59 è el stà maior en il 3. regiment papal engaschà a Macerata (Marche). Il titel von Grüneck/de Carniec resp. de Bubretsch sco titel da noblezza è usurpà.
Litteratura:
E. Durgiai, Die S. zu Bubretsch in Surrhein-Somvix, en: BM, 1955, o.t. 86 s.
Adolf Collenberg
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Schmid von Grüneck [de Carniec], Jacob