e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Schmid von Grüneck [de Carniec], Georgius (de Bubretsch)
* 21-11-1851 a Sumvitg, † 6-5-1932 a Cuira, cat., da Sumvitg. Figl da Martial Anton Modest. Studi da teologia a Londra (sut l'influenza dal cardinal Henry Edward Manning) ed a Cuira, ordinà sacerdot 1875, dr.iur.utr. a Roma 1878. Professer al Seminari da spirituals a Cuira 1880-89, chancelier episcopal 1889-98, vicari gen. dal uvestgieu e regens dal Seminari da spirituals 1898-1908. Tscherna e consecraziun sco uvestg da Cuira 1908. Cun vastas enconuschientschas dal mund e da linguatgs è S. vegnì engaschà sut il papa Benedict XV en la diplomazia dal Vatican ed è sa participà la stad 1917, durant l'Emprima Guerra mundiala, a l'offensiva da pasch papala. S. tgirava tr.a. contacts persunals cun l'archiduca Franz Ferdinand de Habsburg e cun il politicher tud. Matthias Erzberger. El aveva bunas cumpetenzas canonisticas ed organisatoricas. En il conflict davart il modernissem (tendenza entaifer la baselgia rom.-cat.) suandava el consequentamain la lingia rom. repressiva, ed il 1910 el è s'intermess, ens. cun Heinrich Federer, en maniera integralistica en la cuntraversa litterara catolica. Da l'autra vart è el dentant s'engaschà cun success a Roma per ses regens Anton Gisler, erudit en dogmatica e pli tard uvestg auxiliar, suspectà sez da modernissem suenter la cumpariziun da ses cudesch «Der Modernismus» (1912). Il 1906 ha S. edì las «Flurs alpinas», in cudesch da chanzuns che cuntegna era da sias cumposiziuns, tr.a. «A Tgalavaina». Onurà cun il Curtin d'onur da la LG a Trun.
Ovras:
BMVR.
Litteratura:
HS I/1, 504.
Albert Gasser
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Schmid von Grüneck [de Carniec], Christoffel