Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Schauenstein, Thomas vonScheck lemma sequent

Schauenstein, von
Schlatta da la noblezza chavaleresca dal chapitel catedral da Cuira e fam. aristocratica, cun il chastè da S. (vischn. da Masagn) sco residenza originara ed impurtant possess sin la Mantogna ed en la Tumleastga. Sco emprims èn  menziunads il 1258 ils frars Burkhard e Gottfried. Ils S. eran ministerials dals uvestgs da Cuira e residiavan en il chapitel catedral da Cuira, nua che la fam. possedeva en la catedrala in'atgna fossa. En il 14. tsch. èn els stads temporarmain, sco vizdums en la Tumleastga ed avugads da la claustra da Cazas, la schlatta dominanta da la noblezza ministeriala dal chapitel catedral da Cuira en la Tumleastga. Lur connubi han els chattà en la noblezza bassa da l'uvestgieu da Cuira. A partir dal 1320 sa numnava in rom suenter il chastè dad Ehrenfels, il 1350 eran ils S. possessurs dal chastè dad Unter-Tagstein (vischn. da Masagn) ed il 1418 han els survegnì il chastè da Campell sco feud episcopal. A la Faida da Razén 1387-1414 - in conflict da tempra politic-territoriala en la Tumleastga tr. ils baruns de Razén, ils conts de Werdenberg ed il chapitel catedral da Cuira - eran participads era ils S. Fin la mesadad dal 17. tsch. han els fatg part dal circul intern da las fam. dominantas dal Grischun. Quatter da ses members èn stads landfocts a Maiavilla e nov han occupà ils pli auts uffizis en Vuclina. Il 1583 han els acquistà il signuradi da Trin cun Tumein, Rehanau e Trin ch'è vegnì renumnà a partir dal 1615 en signuradi da Rehanau, suenter che Trin era sa cumprà liber e che la fam. S. aveva transferì là sia residenza. Dal 1608-1701 han ils S. possess ultra da quai il signuradi da Lantsch Sut. Il 1611 ha Thomas survegnì il titel da barun da l'imp. Rudolf II. Ils S. han prestà o.t. servetsch militar per la Frantscha, da la quala els eran aderents politics. A partir dal la mesadad dal 17. tsch. ha la fam. pers forza economica ed influenza politica, e suenter il 1650 occupava ella strusch pli uffizis en Vuclina. Il 1742 èn ils S. s'extinguids cun il cont Thomas Franz e l'ierta è ida a ses nev Johann Anton Buol.


Archiv:
Aepisc. Cuira; ASGR.

Litteratura:
Grimm, Aristokratie; Färber, Herrenstand; Clavadetscher/Meyer, Burgenbuch; Collenberg, Amtsleute; HbBG 1 e 2.

Peter Conradin von Planta

lemma precedents Schauenstein, Thomas vonScheck lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: