Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Schmid von Grüneck, NikolausSchmid von Grüneck [de Carniec], Caspar lemma sequent

Schmid von Grüneck [de Carniec]
Schlatta dominanta da politichers da Glion, ref. dapi il 16. tschientaner. L'emprim represchentant attestà il 1397 è Haennes, burger ze Ilanz. Ils S. da Glion faschevan ils fravis. Al maister Jacob èsi reussì il 1544, suenter esser stà chapit. en servetschs imperials, d'obtegnair da Carl V il predicat "von Grüneck" (suenter il chastè sper Glion). Ses figl Hans Jakob, ch'è sa fatg in num sco constructur da la chasa signurila a la Porta Sura a Glion, ha cuntanschì il 1583 per el e per ses trais frars da l'archiduca Ferdinand d'Austria in'ulteriura conferma da noblezza e la brev da vopna. Da sia descendenza provegnan numerus umens da stadi, erudits e militars, uschia il politicher Jacob, il giurist e diplomat Caspar e l'aut uffizier Christoffel. Auters represchentants da la fam. han occupà uffizis locals e regiunals (otg giadas quel dal landrehter) sco era uffizis administrativs en Vuclina (in vicari, trais cumissaris e nov giadas l'uffizi dal podestat). Wilhelm è stà professer ed autur da l'ovra «Problemata philosophica miscellanea». Enturn il 1700 era la fam. S. a Glion en possess da la Casa Carniec (oz Museum regiunal Surselva) e da la Casa Gronda, in imposant edifizi baroc cun tur, erigì il 1677 da Johann Anton (1643-80). Ella disponiva d'entradas da servetschs militars e pensiuns e d'in vast possess funsil che s'extendeva en il 16. tsch. fin en la regiun dal Spleia. Auters members da la fam. èn stads savens activs sco advocats da la populaziun ref. da la Surselva. La nova construcziun dals mirs e da las portas da la citadina da Glion, ch'ils S. avevan promovì vigurusamain il 1717 cun sustegn da Turitg e da Berna, era in simbol da protecziun per la minoritad ref. che sa sentiva smanatschada. La schlatta dals S. è s'extinguida il 1738 a Glion, autras lingias da la fam. han vivì a Degen, Mon, Ftan, Malans e Cuira. Da la famiglia cat. dals S. da Sumvitg (era: Schmid de Bubretsch) deriva l'uv. da Cuira Georgius; ses num e titel da noblezza èn usurpads.


Archiv:
ASGR.

Litteratura:
Maissen, Landrichter, 66-70; Simmen, Wappen, 79-81.

Martin Bundi

lemma precedents Schmid von Grüneck, NikolausSchmid von Grüneck [de Carniec], Caspar lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :