e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Sevgein Sgier, Matthias  Sforza Il ducadi da Milaun è naschì il 1395 cun l'attribuziun dal titel da duca a Gian Galeazzo Visconti tras l'imp. german Wenzel. Cun Francesco èn s'extinguids ils Viscontis il 1447. Sia figlia Bianca Maria era maridada cun il condottiere Francesco I S. ch'ha surpiglià il 1450 il domini. La constituziun dal ducadi ed ils cumbats dals stadis europeics per la supremazia en la Lumbardia han augmentà en il 15. tsch. la relevanza strategica dals pass grischuns, o.t. dal Güglia, Malögia, Set e Spleia. La controlla da quests pass resp. dal traffic da martganzia era il tema principal en las relaziuns tr. Milaun e las Trais Lias. Las Trais Lias profitavan dal basegn creschent dals centers urbans en la Lumbardia (o.t. da Milaun) e da la rivalitad creschenta tr. la Frantscha e la Republica da Vaniescha sut Galeazzo Maria (figl da Francesco I., regent dal 1466-76, assassinà), Gian Galeazzo (ses figl, regent dal 1478-94) e Ludovico Maria, numnà il Mor (regent dal 1494-99 e per in curt temp il 1500). Ils meds diplomatics ils pli impurtants applitgads dals S. en il Grischun eran las pensiuns (per las fam. e las persunas dominantas) sco era las exemziuns ed ils privilegis da dazi (impurtants per il pievel cumin). En quests decennis cumenzan pensiuns, annatas e daners da recrutaziun a giugar ina rolla pli e pli impurtanta (e problematica) en la politica da las Lias. Gia il 1450 ha Francesco S. implitgà l'abazia da Mustér, il Mesauc ed il Valragn en la diplomazia da Milaun, ed en il contract da dazi dal 1467 ha Galeazzo Maria S. concedì a las vals da cunfin libertad da dazi cunter la serrada dals pass per tut ils adversaris da Milaun. Ultra da quai han ils Grischuns profità da la dira concurrenza tr. Milaun e la Frantscha per mercenaris grischuns. En servetsch sco chapit. e cussegliader dals S. è stà p.ex. Rudolf von Salis, numnà il Lung. La fin dal 15. tsch. èn la Vuclina ed ils dus contadis da Clavenna e da Buorm daventads victimas da la politica da squitsch dal Grischun envers Milaun. La stad dal 1486 èn quels entrads cun forza armada a Clavenna ed a l'entsch. dal 1487 via Buorm en Vuclina (sco gidanters dal papa cunter Gian Galeazzo S.) ed han bandunà la val pir suenter avair obtegnì dal duca in'indemnisaziun da 14'000 liras e l'exemziun dals dazis per las Trais Lias (Pasch d'Ardenno). Il duca ha erigì en consequenza div. fortezzas e fortificaziuns sisum il Lai da Com ed en la Val da l'Adda. Ludovico Maria - grond ami da Gian Giacomo Trivulzio fin il 1494 - ha cumbattì il 1499 da la vart da l'Austria, e suenter sia fugia a Puntina ha il domini dals S. a Milaun prendì ina fin  - cun excepziun d'inqual intermez. Ils Franzos han occupà durant ca. 12 onns la regiun ed il 1512 han ils Confederads intronisà Massimiliano S. a Milaun (regent fin il 1515). Ils Grischuns han conquistà quel onn ils dus contadis da Buorm e da Clavenna, las Trais Plaivs e la Vuclina. Francesco II S. (regent dal 1521-25 e dal 1529-35) ha surdà il 1523 Müsch sco feud a l'aventurier Gian Giacomo Medici (numnà il Medeghin). Quel ha provocà las guerras da Müsch dal 1525 e dal 1530 ch'han terminà cun la renunzia dal Grischun a las Trais Plaivs e cun la renconuschientscha da las Terras subditas sco territori da suveranitad grischuna tras Milaun il 1532. Francesco II è mort il 1535 sco ultim exponent dals S. Il ducadi da Milaun è passà a la Spagna, ed a partir da quel mument han cumbattì durant quasi 200 onns ina partida "spagnola" ed ina "franzosa" (per temp en concurrenza cun Vaniescha) per la supremazia politica en las Trais Lias.  Litteratura: G. Schmid, Die Rätischen Bünde in der Politik Mailands zur Zeit der S., 1965; C. Santoro, Gli S., 1968; Schnyder, Handel und Verkehr, 1-184; HbBG 1, 236-38. Adolf Collenberg  Sevgein Sgier, Matthias  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: