Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents RabiusRadio e televisiun lemma sequent

Rabiusa
Num da plirs flums ed auals en il Grischun. Dus da quests èn impurtants. L'emprim percurra la Val Stussavgia e nascha al Bärenhorn resp. al Piz Calandari per sbuccar al nord da Versomi tar l'Isla Bella en il Rain Anteriur. El ha in intschess da 138 km², ina lunghezza da var 30 km, maina blera glitta (plattamorta) ed è sa fatg via tras la Ruinaulta en la chavorgia da Versomi. Ins suppona che quella chavorgia era transibla gia durant il temp preistoric. Ina via charrabla, utilisada fin viaden il temp modern, manava da Caumas al vest da Panaduz sur Sigl Ault a Parstogn e davent da là, sco via da sauma, a la R. ch'ins po traversar sut il Rossboda/Unterhof. Dapi il 1829 resp. il 1897 collian las punts sur questa R. a Chera las vischnancas da Versomi e Panaduz. Giacun Hasper Muoth ha descrit quella R. furibunda en sia «Dertgira nauscha de Valendau e sias fontaunas» (1450): "La vall Versom rabatta stagn da roschas bein armadas; la Rabiusa rocla ferm las auas tschallatadas [...]". L'autra R. impurtanta nascha al Stätzerhorn sur Curvalda e sbucca a Cuira en la Plessur. En il 19. tsch. vegniva ella utilisada da la filandaria Meiersboden a Cuira.


Litteratura:
Planta, Verkehrswege 4, 231 s.; Churer Stadtgeschichte 2, 350-56; Muoth, Ovras 3, 31.

Adolf Collenberg

lemma precedents RabiusRadio e televisiun lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :