San Jorio, Pass da

San Romerio [San Remigio]

Il 1853 han ins scuvert durant lavurs da construcziun a S. Bagn in enchaschament d'aua da funtauna (funtauna da Mauritius), mess a la glisch definitivamain en occasiun dal nov enchaschament da la funtauna il 1907. En la profunditad da 1,4 m èn ins urtà sin dus bischens da lain da laresch, installads en posiziun verticala. Ils bischens avevan in diameter da var 0,8-1,4 m ed in'autezza da var 1,8-2,3 m ed eran p.p. emplenids cun belma. Els eran enramads da duas chaschas da lain rectangularas u trapezoidas. La chascha exteriura era vegnida realisada cun laina radunda (construcziun da bloc), quella interiura cun laina squadrada enchastrada (aissas). Il lain bain mantegnì mussava numerus fastizs da l'elavuraziun. In dals bischens cuntegneva div. objects da bronz, tr.a. duas spadas cun manetscha entira, in fragment d'ina loma da spada, ina loma da stilet ed ina gluva da decoraziun. Ils chats dateschan p.p. anc dal temp da bronz mesaun (ca. 15.-14. tsch. a.C.), p.p. dentant gia da l'entsch. dal temp da bronz tardiv (ca. 13.-12. tsch. a.C.). Ils objects eran plazzads cun premura en il bischen da lain ed eran prob. in'unfrenda ad in dieu da la funtauna. Tenor retschertgas dendrocronologicas pli recentas è vegnida enchaschada la funtauna cun gronda probabilitad il 1466 a.C.
                                                                                                         Jürg Rageth

Cumbain ch'ins aveva percurrì l'Engiadin'Ota en il temp rom., mancan per S. chats da quell'epoca. En il 9. tsch. è vegnida administrada l'Engiadin'Ota, sco feud imperial, d'in tschert Richpert; pli tard è S. passà als conts da Gamertingen ch'han alura vendì il 1137 ed il 1139 lur possess tr. S-chanf e Champfèr (che cumpigliava era S.) a l'uvestg da Cuira. Enturn il 1300 na cumpara S. anc betg sco culegna. Attestà èn mo singuls bains sparpagliads enturn la baselgia da Mauritius. En il temp medieval tardiv fascheva S. part dal vischinadi da la vallada e da la dretgira auta d'Engiadin'Ota, cun la quala S. è s'unì a la LCD il 1367. Il 1462 è vegnida dividida la dretgira auta d'Engiadin'Ota en las duas mesas dretgiras da Suot e da Sur Funtauna Merla, da la quala S. è daventà in vischinadi. En occasiun da la partiziun territoriala da l'Engiadin'Ota (1536-38) ha S. obtegnì in agen territori communal. Ils dretgs d'utilisaziun da las alps, da las pastgiras e dals guauds èn passads dal vischinadi da la vallada als novs vischinadis formads da vitgs e vischnancas da quella.
La baselgia da S. Mauritius era, sper quellas da S. Luzi a Zuoz e da S. Peter a Samedan, ina da las trais baselgias principalas da la val. Sia plaiv cumpigliava la part sura da la vallada da S. fin a Segl, cun las vals lateralas Fex  e Grevasalvas (Segl). Da la baselgia da S. Mauritius exista mo pli il clutger romanic inclinà (terren da bovas). Il 1577 ha adoptà S. sco ina da las davosas vischnancas da l'Engiadina la cretta refurmada. Il 1787 è vegnida erigida en vischnanca la baselgia ref., il 1897 il clutger neogotic. Il 1867 han ins construì la baselgia parochiala cat. deditgada a s. Mauritius, il 1889 a S. Bagn la baselgia cat. consecrada a s. Carlo Borromeo, il 1871 quella engl. ed il 1877 la baselgia franzosa.
Il 1537 ha menz. Paracelsus per l'emprima giada ina funtauna curativa (aua forta) a S. Dapi alura èn cumparidas nundumbraivlas descripziuns medicinalas e geograficas da la funtauna ascha. L'emprima analisa chemica da quella datescha dal 1674. En il 17. e 18. tsch. vegniva ella frequentada o.t. da curants tal. (il duca da Parma e Savoia e.a.). In'emprima chasa da cura è vegnida averta il 1832 (anc senza ustaria, agiuntada pir il 1856). La chasa da cura, realisada il 1864 tenor ils plans da Felix Wilhelm Kubly, ha inizià il svilup da S. sco center da cura da bogns. La funtauna da Mauritius è vegnida enchaschada da nov en ils onns 1853, 1907 e 1937, quella da Paracelsus il 1853. Il nov center da bogns da cura è vegnì terminà il 1976. Enturn il 1850 ha avert Johannes Badrutt en la part sura da la vischnanca l'Hotel Engadiner Kulm ch'è daventà in dals emprims hotels da luxus, munì il 1879 cun l'emprim indriz idraulic stabel per l'illuminaziun electrica da la Svizra. Dapi il 1875 èn vegnids erigids, l'emprim a S. Bagn, alura era en il vitg ed a Suvretta, grandhotels luxurius sco era numerus hotels pli pitschens e pensiuns. Dal 1870 fin a l'Emprima Guerra mundiala è sa transfurmà S. ad ina "citad en las autas muntognas" (lescha da construcziun dal 1906). En ils onns 1880 han importà giasts engl. sports d'enviern sco il curling, il skeleton ed il bobsleigh (bobera natirala dapi il 1890). Alura è sa sviluppà il sport da skis a S. ch'ha organisà ils gieus olimpics d'enviern dal 1928 e dal 1948. Numerus hotels, naschids durant la Belle Epoque, han però subì grondas perditas suenter l'Emprima Guerra mundiala; insaquants èn restads serrads per plirs onns. En ils onns 1920 ha l'economia cumenzà a sa restabilir, ma la crisa economica mundiala e la Segunda Guerra mundiala han puspè franà il svilup. L'expansiun turistica, iniziada en ils onns 1950, ha provocà in boom da construcziun. L'impurtanza da la parahotellaria è creschida. Il 2004 disponiva S. da 5'642 letgs en l'hotellaria, da 3'500 letgs en la parahotellaria e da 4'000 en segundas abitaziuns. Per l'onn turistic 2008-09 èn vegnidas registradas 864'310 pernottaziuns, 791'355 da quellas en hotels e stabiliments da cura, il rest en la parahotellaria. Numerusas attracziuns sco cursas da chavals sin il Lai da S. cuvert da glatsch e naiv (dapi il 1907) contribueschan al renum dal lieu. Ultra da quai dispona S. dapi il 1976 d'in center da trenament en autezzas. Il 1906 è vegnì avert il Museum Engiadinais, il 1908 il Museum Segantini. Dapi il 1904 furma S. la staziun finala da la Viafier retica, dapi il 1910 è la vischnanca colliada cun la Viafier dal Bernina. Tr. il 1896 ed il 1932 circulava in tram electric a S. La vischnanca dispona era da numerusas telefericas, sutgeras e runals. Las funicularas S.-Chantarella (1912) e Chantarella-Corviglia (1928) e las pendicularas S. Bagn-Signal e Corviglia-Piz Nair rendan accessibel ina da las pli vastas regiuns da skis e da viandar da l'Engiadina. S. è, sper Samedan, in dals centers da servetschs da l'Engiadin'Ota. Il 2005 purscheva il sectur terziar 78% da las plazzas da lavur en la vischnanca. A partir da la segunda mesadad dal 19. tsch. è S., oriundamain da lingua rum. (1880 50,2%), vegnida quasi totalmain germanisada. Il 2000 eran 67% dals abitants da S. da lingua tud., 4,7%/12,8% (ML/Lindic) da lingua rumantscha.

Ottavio Clavuot

San Jorio, Pass da

San Romerio [San Remigio]