e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Sontg Antönia Ascharina
Anteriura vischnanca polit., cirq. Luzein, distr. Partenz/Tavau (avant il 2001 Landquart Sura), tud. St. Antönien-Ascharina (uffiz.). Dal 1920 fin il 1953 sa numnava la vischnanca uffizialmain Ascharina. Il 1979 aveva ella anc refusà la fusiun cun Castels e Rüti a la vischnanca da S. Antönia, il 2007 è quella dentant vegnida accumplida. L'abitadi sparpaglià dispona da 26 bains purils e cumpiglia las trais parts Ascharina Dadora, d'Amez e Dadens. El na posseda ni in center ni ina baselgia ni ina chasa da scola. 1850 146 abit.; 1900 95; 1950 149; 2000 119. In singul chat datescha dal temp da fier. En il 13. tsch. ha appartegnì S. al signuradi dals baruns de Vaz, dal 1338-1436 als Toggenburgs, alura als Montforts e Matschs. Dal 1477-1649 è la vischnanca vegnida guvernada, cumbain en maniera limitada, da l'Austria. Fin il 1851 ha S. furmà cun Rüti ina part da la dretgira da Claustra "Ausserschnitz". Ils Gualsers, ch'èn immigrads en il 14. tsch. e che vivevan mo da l'allevament da muvel, han urbarisà ulteriur terren. La vischnanca da S. dispona dapi il 1686 d'ina suletta alp (cun chascharia singula fin il 1951). En il 19. tsch. ha manà la fam. Lötscher ina enconuschenta vaschlaria a S. Fin a la construcziun dal stradun S.-Cuvlignas (1899) è s'orientada la val fermamain vers il Montafun austriac. Oz chattan ils purs da S. in gudogn supplementar en il turissem.
Litteratura:
E. Flütsch, St. Antönien, 1976; Gem. GR, 2003, 332 s.
Otto Clavuot
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Sontg Antönia