e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Stalvies, Jon [John Salvio] Stampa, Bartholome von  Stampa Anteriura vischnanca polit., cirq. Bergiaglia, distr. Malögia, in center administrativ e cultural da la Bergiaglia, furma dapi il 2010 cun las vischn. da Buond, Castasegna, Suogl e Visavraun la nova vischnanca polit. da Bergiaglia. S. cumpiglia d'ina vart las culegnas da S., Borgonovo, Coltura, Montaccio e Caccior (ca. 1000 m), situadas en il fund da la val, da l'autra vart ina vasta exclave al Pass dal Malögia, a la quala appartegnan Cavril e Canova (ca. 1600 m) al pe da la bova dal Malögia sco era la fracziun da Malögia cun Isola, Orden, Pila e Capolago (ca. 1810 m), tuts anteriurs lieus da stad al cunfin occidental da la planira auta engiadinaisa. La culegna da Gualdo, tranter Borgonovo e S., è vegnida bandunada en il 16. tschientaner. 1354 Stamppa. 1850 328 abit.; 1900 445; 1950 414; 2000 531. Sper S. Pietro èn vegnids scuverts fastizs d'abitadis dal temp da Latène e dal temp rom., en pli ina fossa-batschigl (prerom.?) a Palü. Entaifer la cuminanza da cunfin medievala e la posteriura dretgira auta da la Bergiaglia furmava S., ens. cun las culegnas al nord da la Müraia, il cumin da Sopraporta (1535 dretgira civila). Las lavurs d'urbarisaziun en il fund da la val èn vegnidas terminadas en il 12. tsch., e dapi il 15. tsch. exista ina colliaziun tr. S. e la regiun da Malögia. La gronda part dal terren era en possess dals von Salis, von Stampa, Prevost, de Castelmur e da l'uvestg da Cuira, ils dretgs suverans dal qual èn ids a la vischnanca tr. il 1367 ed il 1526. Ecclesiasticamain appartegneva S. a la plaiv gronda da S. Maria a la Porta, ella aveva dentant in chaplon a S. Pietro (Coltura) ed a S. Giorgio (Stampa, menz. il 1327). La vischnanca, aderida il 1533 a la Refurmaziun, aveva dapi il 1549 in agen preditgant. Ella è caracterisada fermamain da l'agricultura; avant l'epoca da la construcziun da viafiers aveva era il transport cun ses mastergns respectivs ina grond'impurtanza. Il 1859 è S. daventada autonoma cun l'extensiun actuala. La Ciäsa Granda dat suttetg ad ina biblioteca istorica cun var 1200 cudeschs dal 16.-20. tschientaner. Las OE Bergiaglia/EWZ èn in'impurtanta funtauna d'entradas. Blers purs da la val lavuran l'enviern en il guaud u penduleschan en l'Engiadin'Ota. Scolas elementaras sa chattan a Visavraun (dapi l'onn scolastic 2009-10) e Malögia (scola bilingua), S. è sedia da la scola elementara. Ca. 30% dals abitants èn catolics. Il 2000 discurrivan 69% da la populaziun talian, 28% tudestg e 2% rumantsch.   Litteratura: Kdm GR 5, 445-55; R. Stampa, Storia della Bregaglia, 1974 (19913); Gem. GR, nr 168, 1984. Adolf Collenberg  Stalvies, Jon [John Salvio] Stampa, Bartholome von  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: