Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents StussavgiaSuarz lemma sequent

Suagnign
Vischnanca polit,, cirq. Surses, distr. Alvra. S. cumpigliava fin ca. l'onn 1960 tschintg gruppas d'abitadis separadas cleramain ina da l'autra e construidas lung la Gelgia: S. Mitgel, Naloz, Sot Curt, Sur Curt e Sur Tocf. 1154 Sueningin, tud. Savognin (uffiz., fin a l'entsch. dal 20. tsch. tud. Schweiningen). Il num Savognin è ina italianisaziun litterarisada. La vischnanca furma oz il center economic e politic da la val. 1643 430 abit.; 1710 530; 1802 365; 1850 469; 1900 444; 1950 766; 1960 632; 1970 820; 2000 882.

Culegna dal temp da bronz sin il Padnal (Mot la Cresta)


Collina marcanta al sid da S. situada a la via dal Güglia. Abitadi impurtant dal temp da bronz, scuvert il 1938 da Bonifaci Plaz e da Walo Burkart cun explotar gera. Emprimas exchavaziuns tras Benedikt Frei 1953-56. Retschertgas archeologicas sistematicas tras il Servetsch archeologic dal chantun Grischun 1971-83, dirigidas da Jürg Rageth. Runcada cun agid dal fieu e fundaziun d'ina emprima culegna en il temp da bronz tempriv (ca. 2200-1700/1600 a.C.). Successiun d'almain tschintg (parzialmain era pliras) fasas d'abitadis (orizonts surpostads A-E) u da vitgs destruids solitamain tras incendis. Lunga stabilitad da l'abitadi sco era da singuls fundaments. La pli veglia culegna da l'epoca dal temp da bronz tempriv consistiva da simplas chamonettas da lain construidas sin in fundament da palissadas, prob. cun paraids da pertgas entretschadas (dimensiun ca. 3 x 5.5 m fin 4.5 x 5.5 m). Dal temp da bronz mesaun (ca. 1700/1600-1300 a.C.) datescha in tip d'abitadi a trais retschas cun chasas cun fuainas che inizieschan prob. la construcziun da travs (fragments da chaltschina da chamonas construidas cun travs). In edifizi cuntegna restanzas metallurgicas (chasa dal ferrer?). Ina imposanta cisterna da laresch, construida cun pals e palancas revestgidas cun chaltschina, serviva prob. a cumbatter il fieu ed a drenar la culegna (reservuar d'aua). A l'entsch. dal temp da bronz tardiv (ca. 13. tsch. a.C.) existivan gronds edifizis (ca. 20 x 6 m) che devan alloschi a pliras fam. e ch'eran medemamain ordinads tenor il tip d'abitadi a trais retschas. A las chasas d'abitar eran prob. anc annectadas stallas ed edifizis d'economia. A partir dal temp da bronz tardiv (a partir da ca. l'onn 1000 a.C.) èn sa midadas las structuras da las chasas e dals abitadis (indizis per ina curta interrupziun da la colonisaziun). Las structuras dals abitadis laschan presumar ina concepziun architectonica gen. ed in'organisaziun communabla da l'abitadi. Las exchavaziuns han mess a la glisch in'impurtanta successiun da stresas da culturas (da passa 2.5 m autezza) cun numerus objects da cheramica e div. utensils da bronz sco era artefacts dad ossa e da crap, vaschs da terracotga, perlas d'ambra, objects osteologics, sems charvunads, chaltschina da chamonas, crustas da metal e provas da minerals. L'abitadi sin il Padnal fa part da la Cultura interalpina dal temp da bronz, derasada en il Grischun, en il Tirol dal Sid ed en la Val dal Rain Alpina. Ils abitants eran purs che vivevan da l'agricultura (dumiec, spelta, furment, salin dubel, arvegl, evtl. avaina) e da l'allevament da muvel, nursas, chauras e portgs. La chatscha e la pestga giugavan ina rolla subordinada. Restanzas da crustas e da metals cumprovan l'explotaziun e l'elavuraziun da minerals d'arom sulfid en la vischinanza dal Padnal durant il temp da bronz. Furmas da cular e fragments da chazzettas cumprovan che l'arom vegniva explotà ed elavurà ad objects da bronz en l'abitadi sez. Chats dad ambras e numerusas restanzas da cheramica documenteschan in commerzi nord-sid sur ils pass alpins. Da l'oriund abitadi han ins exchavà radund in terz fin maximalmain la mesadad tr. il 1971 ed il 1983. Sin fundament da la clera structura da l'abitadi pon ins calcular per la culegna dal temp da bronz in dumber da 40-50 (il pli vegl abitadi) fin maximalmain 80-90 abitants.    

Jürg Rageth


Dal temp roman fin al temp actual


Ils chats dal temp rom. stattan bain en connex cun las rutas dal Set e dal Güglia. La curt da S. appartegneva prob. als bains da la claustra da Mistail. Il 1154 è quella vegnida affidada a la claustra da S. Gliezi a Cuira, cun la resalva dals dretgs episcopals; il 1282 è ella dentant puspè passada a l'uvestgieu ch'aveva plazzà ses podestat en la vischnanca vischina da Riom. Il 1552 è sa cumprà liber il cumin dal Surses (cun il vischinadi da S.) dals dretgs feudals. Il 1487 è sa separada la baselgia da S. Martin, attestada il 1370, da la baselgia principala da Riom. La pastoraziun han exercità dal 1649-1942 ils paders chaputschins ch'han era administrà in ospizi dapi il 1660. La baselgia parochiala da Nossadunna è vegnida consecrada il 1643, quella da S. Mitgel è vegnida renovada il 1663, quella da S. Martin il 1677. Fin enturn il 1960 han pratitgà ils abitants da S. surtut l'agricultura e l'allevament da muvel. Cun la construcziun da la via dal Güglia (1834-40) è sa sviluppà in traffic  da transit ed in turissem da vacanzas moderà (dus hotels enturn il 1870), ils blers gievan dentant anc adina a lavurar sco stagiunaris en l'Engiadina. Meglieraziun ed arrundaziun dal funs 1942-46. Indrizs da transport, o.t. per il turissem da skis, a partir dal 1962. Il boom da construcziun ha durà fin il 1974, la populaziun è creschida, ed ins ha pudì stgaffir novas plazzas da lavur. Grazia al turissem offra S. a l'entsch. dal 21. tsch. lavur d'enviern era a purs, stagiunaris e pendularis. Il 2005 lavuravan 64% da las persunas cun activitad da gudogn a S. en il sectur terziar. Letgs d'hotel 2009/10: 599; pernottaziuns en hotels: 89'235. Part da la populaziun da lingua rum.: 1941 81,1% (LM); 2000 53.1%/70,1% (ML/Lindic).

Jürg Simonett


Litteratura:
Kdm GR 3, 280-96; J. Rageth, Die bronzezeitliche Siedlung auf dem Padnal bei Savognin, en: JbAS, 59/1976 - 65/1982; J. Rageth, Die wichtigsten Resultate der Ausgrabungen in der bronzezeitlichen Siedlung auf dem Padnal bei Savognin, en: JbAS, 69/1986, 63-103; Savognin, red. da J. Simonett, 1988.



lemma precedents StussavgiaSuarz lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :