e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Sursaissa Surselva Romontscha  Surselva Regiun dal Rain Anteriur, district dapi il 2001 (dividì en quatter districts fin il 2000). La S. è resortida da la divisiun francona da la Currezia (Cent Tuverasca, menz. l'onn 831 sco part da la Rezia Sut) e cumpigliava in territori che s'extendeva dal vest da la chavorgia da Versomi e da las Auas Sparsas (en vischinanza dals mulins da Trin) fin a l'aual da Zavragia (sper Zignau) ed a la Val Friberg en la chavorgia da Schlans, nua ch'ella cunfinava cun la Cadi. L'onn 865 è la S. attestada era sco Curwala/Curvala. Il 1050 sa numnava l'entira regiun, inclus la Cadi, supra silvam (= sur la selva/Surselva) u Muntinen, en opposiziun al territori suts. in Planis (Il Plaun, tud. Imboden). 1860 19'322 abit.; 1900 18'540; 1920 20'779; 1950 23'490; 2000 25'275. En il temp autmedieval èn sa sviluppads dominis feudals ed emprims cumins al Rain Anteriur ed en sias vals lateralas. Suenter il nov giurament da la LG (1424) èn naschidas otg dretgiras autas, da las qualas quatter sa chattan en il territori da la S., numnadamain quellas da Mustér, da la Lumnezia, da la Foppa e da Vuorz. La dretgira da Flem è vegnida attribuida a la dretgira auta da Razén, entant che quella da Tenna era colliada cun la S. mo tras l'organisaziun giudiziala. La dretgira criminala era en ils mauns dals cumins ch'èn sa sviluppads suenter il 1424 a purtaders da la pussanza statala per propi. Il 1734 è vegnida dividida la dretgira da Vuorz en ina dretgira ref. da Vuorz ed en ina dretgira cat. da Rueun, cun Rueun, Andiast, Schlans, Siat e Pigniu. Trun è stà da bell'entschatta il center da la LG: la Cuort Ligia Grischa ospitava la dretgira fed. da la LG sco era la dieta annuala, l'uschen. Di da s. Gieri (23 d'avrigl). Glion, nua che las Trais Lias salvavan lur Dieta fed., furmava en roda cun Tavau e Cuira l'avantlieu da la Republica. La Helvetica n'ha gì nagin effect persistent sin las structuras da la S. Il 1851 ha remplazzà il nov urden da las dretgiras distr. e cirq. las dretgiras autas. Il territori da la S. cumpigliava ussa il district dal Rain Anteriur cun il cirquit da Mustér (nov cun Schlans) ed il district da Glogn cun ils cirquits da Glion (nov cun Lags e Sevgein), da la Lumnezia (cun Val) e da Rueun (nov cun Vuorz) sco era la Sursaissa. Flem è vegnì attribuì cun Trin sco cirquit da Trin al district dad Il Plaun, e Tenna ha furmà cun la Stussavgia il cirquit da Stussavgia, incorporà al district da la Mantogna (dapi il 2001 district da S.). Dals vischinadis e cumins vegl-republicans èn naschids suenter il 1851/54 (Const. chant.) las vischnancas polit. modernas. Il 1769 èn ids ad aua ils plans per ina via dal Lai Rivaun sur Pigniu ed il Lucmagn al Lago Maggiore, ed era il project per ina Viafier dal Lucmagn ed ina Viafier Tödi-Greina, lantschads suenter il 1850, han fatg naufragi. L'amplificaziun da la via dal Rain Anteriur, realisada suenter il 1840, e la construcziun da las vias d'access en las vals lateralas (a partir dal 1870) han strusch promovì il svilup da l'artisanat e da l'industria en la regiun periferica prevalentamain agricula. L'industria è sa stabilida mo a Trun, in'hotellaria per propi ha pudì prosperar mo a Flem. L'access a la Viafier retica, realisà il 1912 (fin a Mustér), ed a la Viafier Furca-Alpsu (1926) ha promovì il traffic turistic, el ha dentant strusch transfurmà las structuras economicas fin a la Segunda Guerra mundiala. La construcziun da las OE Patvag, Frisal e Rain Anteriur han alura effectuà ina midada structurala suenter il 1945. L'impurtanza da l'agricultura è sa diminuida en ils onns 1950 en favur da l'industria da construcziun e da transport, avant che la S. è sa sviluppada a moda rasanta ad ina gronda regiun turistica (o.t. sport d'enviern). Il 2000 eran 23% da las persunas cun activitad da gudogn en S. pendularis ordaifer. A medem temp èn era las structuras agriculas vegnidas meglieradas. Ins ha creà successivamain corporaziuns regiunalas, p.ex. il 1967 la Pro Surselva ed il 1977 la Corporaziun da vischnanca Surselva. Il bloc da pussanza cat.-cons. (l'uschen. Lavina nera) è s'indeblì successivamain suenter il 1980. La populaziun da la S., che furmava antruras ina regiun centrala da la lingua e cultura rum., è daventada bilingua tras las midadas economicas e socialas iniziadas il 1960. Part da la populaziun da lingua rum.: 2000 42,5 %/54,8 % (ML(Lindic). Litteratura: J.C. Muoth, Geschichte und Sprache, en: Illustriertes Bündner Oberland, 1903, 104-38; TG, 1962, nr 5, 313-63; P. Tomaschett, S., 1987³; A. Decurtins, Las valladas renanas e lur nums, en: Romanica Raetica, 8/9/1992, 29 s.; Cal. Rom., 2005, 156-243; P. Rieder, Wirtschaftsraum Bündner Oberland, en: Disentis, 72/2005, nr 1, 2-9; D. Blumenthal, Svilup demografic en S. e las consequenzas, en: Cal. Rom., 2007, 120-39. Adolf Collenberg  Sursaissa Surselva Romontscha  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: