e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Scolas autas popularas dal Grischun
Las scolas autas popularas èn instituziuns d'utilitad publica per la scolaziun e furmaziun supplementara da creschids (access liber ad umens e dunnas). Purtadas per ordinari da regiuns, instituziuns, federaziuns professiunalas u societads purtadras politicamain e confessiunalmain neutralas. Ellas porschan curs da tut las spartas da las scienzas e dals arts, viadis da studi, exposiziuns. Ils 8-3-1924 è vegnida fundada en il Volkshaus a Cuira la Scola auta populara da Cuira e conturn. Ella è sortida dals curs privats dad Adolf Attenhofer-Zappa, ses pres. dal 1924-50. Sia periodica «Die Arve» è cumparida il 1924 sco agiunta mensila en la «Neue Bündner Zeitung» e dal 1926 fin il dec. 1928 sco broschura mensila. Quella vuleva era contribuir a la furmaziun dals scolasts e d'interessads domiciliads ordaifer Cuira. Suenter intgins onns da pauca u nagina activitad dapi il 1980, è ella vegnida refundada il matg 2000. Il 1976 è vegnida fundada la Scola auta populara d'Engiadin'Ota (cun ina societad purtadra). Dapi il 1985 exista sut il num Scuntrada e formaziun Surselva ina scola auta populara, fundada da la LR, la Romania e la Renania e purtada actualmain da la LR. La Scuntrada e Furmaziun Ladina, fundada il 1987 da la LR e da l'UdG, è vegnida schliada il 2005.
Litteratura:
K. Hägler, Die Bündner Volkshochschule, en: BM, 1939, 129-57; BM, 1944, 147-63; 1951, 302-13; BZ, 15-8-1991; SO, 13-5-2000.
Adolf Collenberg
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Scola da selviculturs