Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents SerneusSerro, Giovanni lemma sequent

Serra
Noziun per ina fermada, ina stretga u in rempar, tud. Letzi. En il Grischun èn enconuschentas var 12 serras dal temp preistoric, dal temp rom. e dal temp medieval. Il num serra cumpara per l'emprima giada en in doc. da l'onn 840 per la regiun da la chaplutta da Nossadunna en la Val Curvalda. Dal 14. tsch. datescha ina serra a Marcau a l'ost da Flem. Serras datti era en vals isoladas: tar la chaplutta da S. Niclà al nord da Camp/Val S. Pieder e tar il Letziwald tr. Cröt e Cresta/Avras. La serra tr. Masans e Termin, doc. il 1404 sco Serra ed il 1489 sco Letzi, s'extendeva da la muntogna fin al Rain e bloccava la via per Cuira; prob. existiva gia ina tala en il temp roman. Ina serra sumeglianta s'extendeva dal grip dal chastè d'Alt-Aspermont fin al Rain. Il 1400 è menz. ina serra a Farschno (per segirar il passadi sur il Rain?), il 1426 ina tala a Flearda (per segirar il Tavellas?), ed il 1450 è attestada la serra sin il Pass S. Gliezi. A S-chanf/Cinuos-chel bloccava, tenor Durich Chiampell, enturn il 1570 ina serra cun tur e portal l'entira vart sanestra da la val. A Zernez sa chattan anc la tur da defensiun a l'entrada veglia per il Pass dal Fuorn e restanzas d'ina serra cun susta en vischinanza da Susch. Sco toponim cumpara il pled serra surtut a Ramosch, Sent, Scuol, S. Murezzan, Says e Gianatsch. 


Litteratura:
Clavadetscher/Meyer, Burgenbuch.

Martin Bundi

lemma precedents SerneusSerro, Giovanni lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: