e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Sertig Servetschs mercenars  Servetsch archeologic dal Grischun L'archeologia grischuna è stada fin en ils onns 1960 in ressort dal Museum retic. A partir dal 1926 ha il selvicultur Walo Burkart tgirà en uffizi d'onur la collecziun archeologica. L'onn 1960 è Hans Erb vegnì tschernì sco emprim conservatur dal Museum retic en uffizi cumplain, responsabel tr.a. era per la perscrutaziun archeologica dal terren en il chantun Grischun. Il 1967 è il servetsch archeologic chant. vegnì instituziunalisà cun Christian Zindel sco emprim archeolog chant. dal Grischun (suandà il 1989 dad Urs Clavadetscher). La collecziun archeologica e l'entira infrastructura administrativa e scientifica èn vegnidas dischlocadas en il chastè da Lantsch Sut ed il 2007 a Cuira. Il  Servetsch archeologic dal Grischun, integrà en l'Uffizi da cultura dal Grischun dapi il 2003, ha oz ils suandants pensums centrals: exchavar lieus da chat archeologics, perscrutar la construcziun d'edifizis da valur istorica, gidar a far restauraziuns, conservar (archivar) ed evaluar scientificamain ils objects chattads ed ils lieus da chat impurtants. Il Servetsch archeologic dal Grischun renda accessibel las scuvertas al public tras referats, visitas guidadas e publicaziuns. El dispona dapi il 1997 d'in agen labor dendrocronologic, en il qual la laina po vegnir datada cun ina precisiun dad in onn. Las coniferas, numnadamain il pin, il laresch, il schember ed il tieu, utilisadas il pli savens sco laina da construcziun en il Grischun, permettan dataziuns absolutas fin en il quart millenni a.C. Il labor dendrocronologic po vegnir ultilisà era da privats. L'organ da publicaziun dal Servetsch archeologic dal Grischun è il rapport annual.   Adolf Collenberg  Sertig Servetschs mercenars  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: