e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Uniun rumantscha da Schons Uniun rumantscha grischun central (URGC)  Uniun rumantscha da Surmeir (URS) Societad affiliada a la Lia Rumantscha (LR), fundada il 1921 sut il num Uniung Rumantscha da Surses, extendida pli tard sin tut il Surmeir e fusiunada ils 20-6-2006 cun la Renania suts. a l'Uniun rumantscha grischun central (URGC). La finamira da l'URS era, tenor ils statuts dal 1950, da mantegnair e promover la lingua da scola uffiziala dal Surmeir, da conservar las particularitads dialectalas dal Surses e Sotses sco era ils usits e las tradiziuns regiunalas, da promover "tot serious e sang svilup digl noss pievel" e da porscher lectura en l'idiom surmiran. L'URS (fin il 2006) resp. l'URGC (a partir dal 2006) represchenta il Surmeir en il cussegl, en la suprastanza ed, en proporziun a sia fermezza demografica, en la radunanza da delegadas e delegads da la LR. L'organ uffizial da l'URS, surpiglià da l'URGC, era «Igl noss Sulom» (dapi il 1992 fin il 2007 «Sulom surmiran», sortì da la fusiun cun il «Calender surmiran» edì da l'URS dapi il 1951), cumparì dapi il 1922 sco periodica cun contribuziuns davart l'istorgia, la cultura e la litteratura. Tr. il 1984 ed il 2006 han collavuraturs regiunals da l'URS e da la LR procurà per l'animaziun culturala e linguistica en il Surmeir. Dapi il 2007 dispona la LR d'in center da cumpetenza regiunal (LR Grischun Central) cun dus posts decentrals a Suagnign e Ziràn. Litteratura: Statuts dalla URS, 1950; G.D. Simeon, 40 onns URS, en: Sulom, 40/1961, 4-20; G.D. Simeon, Amprova d’ena cronica digl muvimaint rum. an Surmeir, en: Sulom, 50/1971, 9-22. Bernard Cathomas  Uniun rumantscha da Schons Uniun rumantscha grischun central (URGC)  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: