e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Viafier Furca-Alpsu Viamala  Viafier retica (VR) La VR, fundada il 1889, dispona d'ina rait da 384 km ed è la viafier da muntogna la pli lunga da la Svizra. Staziun la pli bassa: Tiraun (429 m), la pli auta: Bernina Hospiz (2253 m). Il naufragi da la Viafier da las Alps Orientalas e l'interrupziun dal commerzi da martganzia sur ils pass grischuns suenter l'avertura dal tunnel dal Gottard (1882) han persvadì politichers grischuns enturn Thomas von Albertini da la necessitad d'avrir il chantun Grischun cun ina rait da viafiers per promover il turissem e l'agricultura. L'emprima lingia da viafier grischuna, averta il 1889-90 tras il Partenz, è però vegnida construida sin iniziativa privata da l'hotelier Willem Jan Holsboer da Tavau. Il 1894 ha la Viafier a binari stretg Landquart-Tavau SA surpiglià il num VR. Pir la lescha chant. da viafier dal 1897, che reglava l'engaschament finanzial dal Grischun (subvenziuns ed acquist da las aczias da la banca da viafier tras il Chantun), ha alura pussibilità la planisaziun e la construcziun d'ina rait chant. da viafiers a binari stretg. Il 1898 ha la Confed. concedì 8 miu. frs en favur da la VR. Fin l'entschatta da l'Emprima Guerra mundiala han las lingias da viafier Landquart-Tusaun (1896), La Punt/Rehanau-Glion (1903), Tusaun-S. Murezzan (1903-04), Tavau-Filisur (1909), Glion-Mustér (1912) e S. Murezzan-Scuol (1913) avert las valladas principalas dal Grischun. Il 1930 èn vegnidas colliadas la rait da la Viafier Furca-Alpsu (Mustér-Brig) cun la Viafier Visp-Zermatt. Da quella colliaziun è resortì l'uschen. Glacier-Express (S. Murezzan-Zermatt), ina colliaziun turistica directa da 291 km lunghezza. Las anteriuras viafiers privatas (Viafier Blinzuna-Mesocco, 1907-78; S. Murezzan-Tiraun [Viafier dal Bernina, 1910] e Viafier Cuira-Arosa, 1914) èn vegnidas integradas pir il 1941 resp. il 1944 en la VR, sin basa da la lescha fed. davart l'agid ad interpresas da viafier e da navigaziun (1939). Questa lescha concedeva daners fed. a meds da transport privats d'impurtanza naz. en difficultads finanzialas. Il tunnel dal Veraina tr. il Partenz (Selfranga) e l'Engiadina Bassa (Sagliains), avert il 1999, è l'emprima prolungaziun da la rait da la VR dapi il temp da fundaziun. Ils inschigners da viafiers operavan en il senn da la protecziun da la patria, iniziada a l'entsch. dal 20. tsch., e prendevan resguard sin la cuntrada ch'ins vuleva preschentar als viagiaturs en maniera pli spectaculara pussaivla. Las construcziuns artifizialas - 117 tunnels e 495 punts - sco era las staziuns e pli tard ils indrizs electrics èn vegnids adattads a materials e stils da la regiun. L'impurtanza economica da la VR sco patruna da 1'311 collavuraturas e collavuraturs il 2010 (segund gronda emploiadra dal chantun Grischun) è considerabla. En il traffic da martganzia senta ella la gronda concurrenza da la via. Las frequenzas da passagiers percunter èn s'augmentadas cleramain cun il svilup dal turissem d'enviern e muntavan il 2010 a 10,4 miu. persunas. La lingia da la VR da l'Alvra al Bernina è vegnida recepida il 2008 sco part dal patrimoni cultural mundial da l'Unesco. Litteratura: W. Catrina, Die Entstehung der Rhätischen Bahn, 1972; C. Asmus, Rhätische Bahn, 1988-89; Die kühnste Bahn der Welt: Die Rhätische Bahn in Literatur und Kunst, edì da H.P. Häberli, 2010. Max Hilfiker  Viafier Furca-Alpsu Viamala  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: