e-LIR / Lexicon
Assistenza e-LIR
Contact
Publicaziun
Sponsurs
|
Lexicon Istoric Retic (LIR)
A B C D E F G H I J K L M N O P Q R S T U V W X Y Z
Trin
Signuradi sin il territori da la vischnanca odierna da T., enconuschent era sco signuradi dal Crap Sogn Barcazi (tud. Hohentrins). Tras l'amplificaziun da la baselgia da S. Barcazi, ina baselgia fortifitgada dal temp medieval tempriv, ad in chastè feudal, è Crap S. Barcazi daventà en il temp autmedieval la sedia dal signuradi da T. Quel è sortì d'in vegl bain roial ed è passà sco feud da la claustra da Rehanau als signurs de Frauenberg (13. tsch.) ed a quels de Werdenberg-Heiligenberg (ca. 1310).
Il signuradi da T. cumpigliava l'intschess da las vischnancas da T. e da Tumein cun la duana ed il center da transit da La Punt/Rehanau. Il 1428 è T. passà als signurs von Hewen. Il 1457 ha Friedrich von Hewen decidì en ina sentenzia da cumpromiss davart ils cunfins territorials tr. T. e Tumein. Il 1470, suenter l'incendi dal chastè sin il Crap S. Barcazi, è la sedia signurila prob. vegnida transferida a Canaschal (vischn. da T.) u a La Punt/Rehanau. Il 1530 ha la vischnanca da T. cumprà ora la dieschma gronda e las culengias per 1'000 fl. Il 1568 è il signuradi da T. passà a Johann von Planta († 1572), il 1583 a Rudolf von Schauenstein. Il 1616 è la vischnanca da T. sa cumprada libra per 10'000 curunas da tut ils dretgs signurils anc existents. Il Signuradi, limità al vitg da Tumein e da La Punt/Rehanau, sa numnava da qua davent signuradi da La Punt/Rehanau.
Litteratura:
H. Erni, Historia dil signuradi de T. e della vischnaunca de T., 1913; Kdm GR 4, 4, 21, 30; T., red. da J. Clopath, 2003.
Martin Bundi
© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.
| |
|
Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail:
|
|
Trilinguitad grischuna