e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Blaurock, Jörg Blumenthal  Blegn, Val dal Val tr. il Pass dal Lucmagn e Biasca, percurrida dal flum Brenno, tal. Valle di Blenio. Colonisada da Celts, Rets e Romans. Durant il temp da bronz colliaziun sur la Greina cun Crestaulta/Val Lumnezia. En il 12. tsch. ha la val obtegnì ina tscherta impurtanza strategica al Lucmagn per ils imperaturs Staufers e lur politica cun l'Italia. Konrad III (1138-52) ha infeudà ils da Lenzburg cun il ministeri imperial sur la Val dal B. e la Leventina. La fam. de Torre, parentada cun la noblezza retica, aveva la prefectura; ella ha occupà cun Reinher de Torre dal 1194 fin il 1209 la sedia episcopala da Cuira ed ha obtegnì il 1213 da l'imp. Friedrich II il ministeri imperial sur l'abazia da Mustér. Dapi il 1200 cumpigliava la val las vischinanzas da Luorscha, Aquila, Consiglio, Dongio, Semione e Malvaglia. Il 1335 è ella vegnida suttamessa al domini dals Visconti/Milaun. Fin en il temp medieval tardiv ha era la claustra da Mustér possess bains feudals ed exequì la giurisdicziun civila en la val. Il 1208 è attestà per l'emprima giada in conflict tr. las duas partidas conc. las alps al Lucmagn. La gronda part dals cunfins da las alps tr. la Val dal B. e la Cadi era gia fixada fin viaden il 16. tschientaner. Il 1376 ha l'abazia da Mustér fatg in contract cun ils Blegnascs per l'exemziun da dazi - in'emprova d'augmentar il traffic da sauma e da vegnir integrà en la politica concernent il Lucmagn, proseguida dals signurs feudals dal Grischun avant il conclus da la Lia da Glion dal 1395. La colonisaziun da la regiun da Vrin (Val Lumnezia) en il temp medieval tardiv è colliada stretgamain cun questa val: ils Blegnascs avevan cumprà, per satisfar lur grond basegn da pascul, alps sin la Greina, dretgs da vias e pastgiras sin l'Alp Canal, a Blengias e Scharboden ed avevan tr.a. colonisà parzialmain Vanescha. Els eran arrivads sur il Pass dal Soreda a Zervreila (menz. il 1324, evtl. fundà dals Blegnascs) ed avevan utilisà la Lampertschalp (Lamparten/Lumbards) e la Lenta. Ils dretgs d'alp, exequids dals Blegnascs da la vart grischuna, èn vegnids schliads pir a la fin dal 19. tschientaner. A partir dal 1900 circulava mintga di ina charrotscha da posta, a partir dal 1920 in auto da posta d'Acquacalda a Mustér. Il 1910 è vegnida averta la lingia da viafier da Biasca ad Acquarossa.  Litteratura: Müller, Abtei Disentis; L. Deplazes, Alpen, Grenzen und Pässe im Gebiet Lukmanier-Piora (13.-16. Jahrhundert), 1986; Bundi, Besiedlung; Disentis, 71/2004, nr 3, 49-57. Adolf Collenberg  Blaurock, Jörg Blumenthal  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: