e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Thalkirch Theobald, Gottfried Ludwig  Theobald, Anna Wilhelmina * 23-3-1863 a S-chanf, † 14-8-1915 a Castrisch, ref., da Hanau (Hessen) e da S-chanf (1864). Figlia da Gottfried Ludwig. Nubila. Instruida da ses bab en las scienzas natiralas gia en la vegliadetgna prescolara. Suenter la scola da citad a Cuira, ha ella frequentà sco emprima giuvna la Scola chantunala. Il 1882 ha T. cumenzà a studegiar medischina a Genevra, nua ch'ella ha promovì en medischina sco ina da las emprimas dunnas da la Svizra. Sia vita ha però prendì in decurs fitg tragic: suenter in segiurn en l'America ed intgins paucs onns a Basilea, è T. turnada a Cuira, nua ch'ella è stada activa sco schurnalista; paupra sco ina mieur-baselgia, è ella vegnida alloschada ens. cun sia mamma e sia sora en la chasa d'orfens. Causa ses caracter excentric è ella vegnida messa sut curatella per vita duranta. Sco "malsauna da spiert quieta" ha ella pudì midar en in alloschi privat a Valendau, pli tard a Glion. Il 1898 èn cumparidas sias «Poesias», in cudesch cun lirica deditgada a la natira. Il destin tragic da T., che regorda las vitas tragicas da bleras piunieras academicas, è d'attribuir pli al temp che a sias disposiziuns persunalas. Litteratura: U. Jecklin, Auf den Spuren weiblicher Erziehung in Chur, en: BM, 1998, 341 s. Adolf Collenberg  Thalkirch Theobald, Gottfried Ludwig  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: