e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Theobald, Anna Wilhelmina Theodolf  Theobald, Gottfried Ludwig * 21-12-1810 ad Allendorf bei Hanau (Hessen), † 15-9-1869 a Cuira, ref., burgais tud., da S-chanf  (1864). Figl dad Adam, preditgant, e da Friederike n. Mannel. ∞ Elisabeth n. Kohler, da Sumiswald/BE. Gimnasi a Hanau. Suenter il studi da teologia a Marburg e Halle (1827-32), è T. sa deditgà - sper ses pensum da preditgant auxiliar - a las scienzas natiralas. Scolast privat a Montpellier 1839, mag. gimnasial a Hanau 1843. Comm. lib. dal parlament da Kurhessen 1848, sco tal - privà dal mandat e da la plazza tras la Regenza reacziunara - fugia a Genevra il 1852. Prof. d'istorgia natirala e geografia a la Scola chant. a Cuira a partir dal 1854. T. è stà in dals gronds perscrutaders e l'emprim cartograf sistematic dal mund alpin dal Grischun e da las Alps Orientalas. Editur da numerusas ovras davart la geologia, botanica, zoologia, meteorologia e topografia da las Alps, tr.a. dals «Naturbilder aus den Rätischen Alpen. Ein Führer durch Graubünden»(1860). Autur da l'emprim guid da viadi per las Alps Grischunas (1862). A T. è deditgada la spezia da mistgel Dedymodon Theobaldi, scuverta il 1855. Collavuratur da l'«Atlas geologic da la Svizra». Sia collecziun d'istorgia natirala è stada in fundament impurtant per il Museum retic. Vicepres. da la Societad grischuna per la perscrutaziun da la natira (SGPN) a partir dal 1859. Correspundent e comm. d'onur da numerusas societads specificas da la Svizra e da l'exteriur. Suenter sia mort han amis da la Nova SGPN e da la secziun Rezia dal CAS constituì la Fundaziun Theobald cun l'intent da sustegnair sia fam. totalmain depauperisada e culpida d'in destin fitg tragic (1870). Tavla commemorativa sper la Punt Russein tr. Sumvitg e Mustér. Litteratura: H. Szadrowsky, Gottfried Ludwig T., en: JNGG, 15/1869/70, 85-135 (cun reg. cumplet da referats e publ.); Bedeutende Bündner 2, 23-32; I. Berther, La tabla emblidada, en: Annalas, 116/2003, 109-37 (cun fotogr.). Adolf Collenberg  Theobald, Anna Wilhelmina Theodolf  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: