e-LIR / Lexicon Assistenza e-LIR Contact Publicaziun Sponsurs	Lexicon Istoric Retic (LIR) Lemma Rumantsch Deutsch Italiano Chavazzin   A  B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z  Toggenburg, de Toggenburg, Johann Georg de  Toggenburg, Friedrich VII von * ca. 1370 prob. sin il chastè da Solavers (sper Crusch), † 30-4-1436 a Feldkirch. Figl da Diethelm e da Katharina von Werdenberg-Heiligenberg. ∞ 1391 Elisabeth n. von Matsch, figlia dad Ulrich. A partir dal 1387 è T. stà participà a la successiun ereditara. El represchenta il tip da l'aristocrat curunà da success, strusch integrà en las suveranitads territorialas, cun in domini purtà mo da paucs uffiziants e fixà mo parzialmain en scrit. Cun ina suita pitschna ma efficazia è el stà in dals interprendiders militars aristocratics ils pli brigliants da ses temp. La repartiziun dal possess dals T. il 1394 tr. el e ses aug Donat han fatg dad el il signur territorial il pli pussant en la Rezia Sura. El ha obtegnì ils chastels da Belfort/Brinzauls, Strahlegg/Gianatsch, Ober Sansch-Kapfenstein/Cuvlignas, Castels/Luzein e Marschlins/Eigias, sco era il chastè e la citad da Maiavilla ed ils chastels da Wynegg/Malans, Fracstein e Solavers/Sievgia, inclus ils bains funsils ed ils dretgs respectivs. Ultra da quai ha el anc conquistà il 1435 il signuradi da Neu-Aspermont/Gianin. El ha regnà cun maun dir ed era fitg temì da ses subdits. Suenter la mort da T., restà senza uffants, è ida l'ierta allodiala il 1436 als de Sax-Mesauc, von Montfort-Tettnang, von Brandis e von Aarburg. Per tema d'in avegnir intschert cun ina separaziun dals territoris signurils e la cessiun da quels als Austriacs, han ils subdits fundà a Tavau il 1436 la Lia da las Diesch Dretgiras.  Litteratura: GHS 1, 46-53; Pieth, Bündnergeschichte, 82 s.; Clavadetscher/Meyer, Burgenbuch; E. Eugster, Die Herren von T., en: Wirtschaft und Herrschaft, edì da T. Meier, R. Sablonier, 1999, 311-42; HbBG 2, 262; Sankt-Galler Geschichte 2003, t. 2, 2003, 103-28. Erwin Eugster (ac)  Toggenburg, de Toggenburg, Johann Georg de  © HLS: Tuts dretgs d’autur da questa publicaziun electronica èn tar il Historisches Lexikon der Schweiz, Berna. Per tut ils texts publitgads a moda electronica valan las medemas reglas sco per la publicaziun stampada. Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: