Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Travers, GianTravers, Johann Victor (von Ortenstein) lemma sequent

Travers, Johann Rudolf (von Ortenstein)
* tr. il 1585 ed il 1594, † suenter ils 11-6-1642 a Tumegl, ref., probablamain convertì al catolicissem, da Zuoz. Figl da Johann, uffizier, e da Lucrezia n. von Schauenstein, figlia da Rudolf. Frar da Johann Victor (*1582). ∞ Catarina n. von Planta, figlia da Pompejus von Planta. T. è daventà qua tras era cumproprietari dal chastè da Rapertg. Suenter studis a Dillingen (Baviera) en servetsch militar franz. 1614-32. Derschader a la dretgira nauscha da Cuira dal 1620. Il 1624 è T. vegnì delegà da las Trais Lias (ens. cun Jakob Schmid von Grüneck) a la Dieta confed. a Soloturn per negoziar davart pensiuns, la Vuclina ed il Contract da Madrid (davart quel ha el tractà ina segunda giada persul cun il Marquis de Cœuvres il 1627). Il 1635 è el stà lt col. sut il Duca de Rohan en Vuclina (regiment da Schauenstein, alura da Salis-Marschlins), participà a la congiuraziun cunter Rohan, senza esser stà comm. da la Lia da la chadaina (cuntrari a ses frar Johann Victor). Il 1639 ha T. tractà sco delegà dal Stadi da las Trais Lias l'Emprim Capitulat da Milaun. Suenter avair quittà il servetsch franz., è el entrà cun in agen regiment en servetsch da la Spagna-Milaun. T. è stà, sper Gieri Genatsch, in dals umens da stadi ils pli pussants engaschads per la partida spagn.-austr. vers la fin dals onns 1630 ed el è stà a maisa cun Genatsch la saira dal murdraretsch da quel ils 24-1-1639 a Cuira.


Litteratura:
A. Hammer-von Tscharner, Die Familie T. von Ortenstein, lic. Turitg, 1984, 139-66.

Adolf Collenberg

lemma precedents Travers, GianTravers, Johann Victor (von Ortenstein) lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :