Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents ZuccalliZulauf, Christine lemma sequent

Zuccalli, Enrico
* 1642 a Roveredo, † 8-3-1724 a Minca, cat., da Roveredo. Figl da Giovanni, stuccatur, e da Caterina n. Barbieri. ∞ 1684 Maria Maddalena n. Carduff, da Murmarera. Furmaziun a l'architect a Roma (ca. 1660), prob. en il ravugl da Gian Lorenzo Bernini. Attestà il 1667 en Frantscha ed arrivà il 1669, ens. cun ses quinà Gaspare (1629-78), a Minca. Activ en il servetsch dal prinzi electur a partir dal 1672. Nominà architect il 1673, architect principal il 1677 ed architect suprem da la curt il 1679. Z. ha surpiglià dad Agostino Barelli la direcziun da las lavurs vi da la baselgia da l'Urden dals theatins (1674-92) e dal chastè da Nymphenburg a Minca (1674-76). Tr. sias ovras principalas figureschan era il chastè da Lustheim (1684-88), il nov chastè da Schleissheim (1701-04), il palaz roial da Schleissheim e l'amplificaziun dal chastè da Nymphenburg (1701-05), realisada ens. cun Giovanni Antonio Viscardi. Ultra da quai è Z. stà activ a Brüssel, nua ch'el ha restructurà il 1694 la residenza da Maximilian Emanuel, guvernatur dals Pajais Bass spagn., ed a Lüttich, en cumissiun da Joseph Clemens von Bayern (restabiliment dal palaz episcopal, 1695). Destituì da ses impegns il 1706, durant la perioda da l'administraziun austr. a Minca, substituì da Viscardi. A partir dal 1709 ha el restaurà la baselgia ed il convent benedictin dad Ettal. Reintegrà en sias funcziuns suenter il return da l'electur a Minca il 1715, ha el construì il convent e la baselgia dals franciscans a Mittenheim (1717-20). Cun Viscardi è el stà l'exponent principal da l'architectura barocca en Baviera ch'el ha renovà cun elements stilistics tal., en particular da derivanza da Bernini. Suenter sia mort han ses cusrins en il Mesauc instradà in lung process per vegnir en possess da ses bains en la val.


Archiv:
Fundaziun Archivio a Marca, Mesocco.

Litteratura:
M. Pfister, Baumeister aus Graubünden - Wegbereiter des Barock, 1993; Graubündner Baumeister und Stukkateure, edì da M. Kühlenthal, 1997, 111-63 (cun bibliogr.).

Cesare Santi

lemma precedents ZuccalliZulauf, Christine lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redaktion HLS, Hirschengraben 11, Postfach, 3001 Bern, tel. +41 31 313 13 30, E-mail: :