Logo und Banner  

Lexicon Istoric Retic (LIR)

Lemma
Chavazzin  

A
 B  C  D  E  F  G  H I  J  K  L  M  N  O  P  Q  R  S  T  U  V  W  X  Y  Z

stampa
lemma precedents Gabriel, SteffanGadient, Andreas lemma sequent

Gabrieli, Gabriele de
* 18-12-1671 a Roveredo, † 21-3-1747 ad Eichstätt (Baviera), cat., da Roveredo. Figl da Giovanni, impressari, e d'ina sora da Gaspare Zuccalli, architect. ∞ 1) 1710 Giovanna Marta n. Tini, 2) 1716 Magdalena n. Pfaller. Il 1689/90 è G. sa rendì a Vienna, nua ch'el ha lavurà l'emprim per il cont Andreas von Kaunitz ed a partir dal 1694 sco collavuratur da Domenico Martinelli per il prinzi Johann Adam von Liechtenstein sco era dal 1694-1703 resp. dal 1706-16 per ils marches Georg Friedrich e Wilhelm Friedrich von Ansbach. L'onn 1709 è el daventà manader da construcziun da Wilhelm Friedrich, ha renovà la residenza da quel ed ha construì il pitschen chastè dal prinzi. Il 1695 è el sa trategnì a Roma. Dal 1714-47 è el stà manader da construcziun en servetsch dal prinzi-uvestg dad Eichstätt, per il qual el ha construì ina trentina baselgias, chastels, palazis e monuments, tr.a. la fatschada vest dal Dom (1714), la baselgia da Notre Dame (1719-21), l'Oberstjägermeisterei (1721-22), il palazi da la chancellaria (1726-28), il palazi dals chavaliers ed il vicariat general (1733), il monument sepulcral da l'uvestg von Castell (1729-30), la residenza da stad (1732-35) e la prepositura (1737). Ad Eichstätt ha G. exequì div. ovras era per auters patruns: la claustra da Rebdorf (1715-19), ils palazis d'Arzat-Gebsattel (1715), Welden (1715-17), Schönborn (1721), Ostein-Riedheim (1723-24), Welten-Schellard e Beyschlag (1738). Il 1733 ha el restaurà sia atgna chasa en la Marktgasse, l'odierna Gabrielistrasse. Ultra da quai ha G. construì la prepositura e la chaplutta da S. Maria en il Dom dad Augsburg, la baselgia da Hitzhofen (1722-23), il chastè da Bertoldsheim (1718-24), l'oranscharia dal chastè dad Oettingen (1725) e la baselgia parochiala da Herrieden (1733-36). Ils collavuraturs ils pli impurtants da G. èn stads ses frars Francesco e Giovanni Gaspare ed ultra da quests Giovanni Rigaglia, Andrea e Domenico Reguzio, oriunds da la medema val, sco era Giovanni Domenico Barbieri ch'han realisà blers da ses plans. Sper ils Grischuns Enrico Zuccalli - cun il qual el era parent - e Giovanni Antonio Viscardi vala G. sco in dals represchentants ils pli impurtants dal baroc activs en la Germania dal Sid. A Roveredo stat anc oz sia chasa paterna.



Litteratura:
Zendralli, I magistri grigioni, 86-99; Graubündner Baumeister und Stukkateure, edì da M. Kühlenthal, 1997, o.t. 244-92.

Cesare Santi

lemma precedents Gabriel, SteffanGadient, Andreas lemma sequent

pagina precedenta


© HLS: Tuts dretgs d’autur da questa publicaziun electronica èn tar
il Historisches Lexikon der Schweiz, Berna. Per tut ils texts publitgads a moda
electronica valan las medemas reglas sco per la publicaziun stampada.





Redacziun LIS, Gerberngasse 39, Chaum postal 322, 3000 Berna 13, tel. +41 31 313 13 30, e-mail: